എന്തൊരു മോശം അവസ്ഥയാണിത്..!! ട്രെയിനിൽ കച്ചവടം നടത്തുന്ന പാവപ്പെട്ടവരിൽ നിന്ന് അതിവിദഗ്ധമായി കള്ളത്തരം കാണിക്കുന്ന യാത്രക്കാരൻ; വ്യാപക വിമർശനം

ഡൽഹി: ട്രെയിനിൽ കഠിനാധ്വാനം ചെയ്ത് സാധനങ്ങൾ വിൽക്കുന്ന കച്ചവടക്കാരിൽ നിന്നും ഒരു യാത്രക്കാരൻ ലഘുഭക്ഷണങ്ങളും വെള്ളക്കുപ്പികളും മോഷ്ടിക്കുന്ന വീഡിയോ സോഷ്യൽ മീഡിയയിൽ വ്യാപകമായ വിമർശനത്തിന് കാരണമാകുന്നു. 'ഒപ്രസ്സർ' എന്ന എക്സ് (Twitter) ഉപയോക്താവാണ് ഈ ദൃശ്യങ്ങൾ പങ്കുവെച്ചത്.

ട്രെയിനിലെ മുകളിലത്തെ ബർത്തിൽ  ഇരിക്കുന്ന യാത്രക്കാരൻ, താഴെ ഇടനാഴിയിലൂടെ നടന്നുപോകുന്ന കച്ചവടക്കാരുടെ കൊട്ടയിൽ നിന്നും പെട്ടികളിൽ നിന്നും അവർ അറിയാതെ സാധനങ്ങൾ കൈക്കലാക്കുന്നതാണ് വീഡിയോയിലുള്ളത്.

മാംഗോ ജ്യൂസ് പാക്കറ്റുകൾ, സമൂസ, കുപ്പിവെള്ളം, എഗ്ഗ് ബിരിയാണി എന്നിവ ഇയാൾ ഇത്തരത്തിൽ തട്ടിയെടുക്കുന്നത് ദൃശ്യങ്ങളിൽ വ്യക്തമാണ്. കച്ചവടക്കാർ കടന്നുപോകുമ്പോൾ പണം നൽകാതെ സാധനങ്ങൾ എടുക്കുകയും തുടർന്ന് മോഷ്ടിച്ച എഗ്ഗ് ബിരിയാണി ഇയാൾ കഴിക്കുകയും ചെയ്യുന്നുണ്ട്.

മോഷ്ടിക്കുന്ന ഓരോ തവണയും ഈ യാത്രക്കാരൻ ചിരിക്കുന്നതും കൂടെയുള്ളവർ ഇത് ആസ്വദിക്കുന്നതും വീഡിയോയിൽ കാണാം. ഇത് ദാരിദ്ര്യം കൊണ്ടല്ല, മറിച്ച് അടിസ്ഥാനപരമായ മര്യാദയോ ലജ്ജയോ ഇല്ലാത്തതുകൊണ്ടാണ് ഇയാൾ ചെയ്യുന്നതെന്ന് സോഷ്യൽ മീഡിയയിൽ വിമർശനം ഉയർന്നു.

തുച്ഛമായ ലാഭത്തിന് വേണ്ടി കഠിനാധ്വാനം ചെയ്യുന്ന പാവപ്പെട്ട കച്ചവടക്കാരെ പരിഹസിച്ച ഇയാൾക്കെതിരെ കർശന നടപടി വേണമെന്ന് ആവശ്യപ്പെട്ട് റെയിൽവേ മന്ത്രാലയത്തെയും ആർ.പി.എഫിനെയും (RPF) ടാഗ് ചെയ്ത് നിരവധി പേർ രംഗത്തെത്തിയിട്ടുണ്ട്.