ചേട്ടന്‍ ഉറക്കത്തിലാണെന്ന് ഉറപ്പാക്കാന്‍ ഹെല്‍മറ്റ് തറയില്‍ ഇട്ട് ശബ്ദം ഉണ്ടാക്കി; ഉറക്കത്തിലാണെന്ന് മനസിലായപ്പോള്‍ കഴുത്തില്‍ കയറിട്ട് മുറുക്കി കൊലപ്പെടുത്തി; സഹോദരന്‍ ആത്മഹത്യ ചെയ്തെന്ന് നാട്ടുകാരെ അറിയിച്ചു; പൊലീസിന് തോന്നിയ സംശയം ചുരുളഴിച്ചത് കൊലപാതകം
ചെങ്ങന്നൂര്‍: സഹോദരന്‍ ആത്മഹത്യ ചെയ്തെന്ന് നാട്ടുകാരെയും പൊലീസിനെയും അറിയിച്ചതിന് പിന്നാലെ പൊലീസിന് തോന്നിയ സംശയം ചുരുളഴിച്ചത് കൊലപാതകത്തിലേക്ക്. ചെങ്ങന്നൂര്‍ തിട്ടമേല്‍ മാര്‍ത്തോമ അരമനക്കു സമീപം ചക്രപാണി ഉഴത്തില്‍ ശ്രീധരന്റെയും പരേതയായ കുഞ്ഞമ്മയുടെയും മകന്‍ പ്രസന്നന്‍? (47) മരിച്ച വിവരം പ്രതിയായ അനുജന്‍ പ്രസാദ് (45) തന്നെയാണ് നാട്ടുകാരെ അറിയിച്ചത്. ഇയാളെ പൊലീസ് അറസ്റ്റ് ചെയ്തു.
ഇയാളെ പോലീസ് സംഭവ സ്ഥലത്ത് എത്തിച്ച് തെളിവെടുപ്പ് നടത്തി. കൊലപാതകം നടത്തിയത് മുന്‍വൈരാഗ്യം മൂലമാണെന്ന് പ്രതി സമ്മതിച്ചു. കൊലപാതകത്തിന് മുന്‍പ് സഹോദരന്‍ ഉറങ്ങിയെന്ന് ഉറപ്പാക്കാന്‍ ഹെല്‍മറ്റ് തറയിലിട്ട് ശബ്ദമുണ്ടാക്കിയെന്ന് പ്രതി വെളിപ്പെടുത്തി.
ഞായാറാഴ്ചയാണ് നാടിനെ നടുക്കിയ സംഭവം. പ്രസന്നനെ അനുജന്‍ പ്രസാദ് കഴുത്ത് ഞെരിച്ച് കൊലപ്പെടുത്തുകയായിരുന്നു. ഏറെ നാളായി ഇവര്‍ തമ്മില്‍ ഉണ്ടായ കലഹത്തിന്റെ അവാസനമെന്നോണമാണ് കൊലപാതകത്തില്‍ കലാശിച്ചത്. സ്ഥിരമായി മര്‍ദിക്കുന്നതിനാല്‍ പ്രസാദിനെ ഭയന്ന് പ്രസന്നന്‍ രാത്രി വളരെ വൈകിയാണ് വീട്ടില്‍ എത്തിയിരുന്നത്. ശനിയാഴ്ചത്തെ വഴക്കിനെത്തുടര്‍ന്ന് പുറത്തുപോയ പ്രസന്നന്‍ പുലര്‍ച്ച രണ്ടോടെയാണ് വീട്ടിലെത്തിയത്. മദ്യലഹരിയില്‍ തറയില്‍ കിടന്നുറങ്ങി. ഈ സമയം അടുത്ത മുറിയിലുണ്ടായിരുന്ന പ്രസാദ് എത്തി കഴുത്തില്‍ കയര്‍ കുരുക്കി കൊലപ്പെടുത്തുകയായിരുന്നു.
ഉറക്കത്തിലാണെന്ന് ഉറപ്പുവരുത്താനായി പ്രസാദ് ആദ്യം ഹെല്‍മെറ്റ് തറയില്‍ ഇട്ട് ശബ്ദം ഉണ്ടാക്കി. ഉറങ്ങിയെന്ന് മനസിലായപ്പോഴാണ് പ്ലാസ്റ്റിക് കയര്‍ ഉപയോഗിച്ച് കഴുത്ത് ഞെരിച്ച് കൊലപ്പെടുത്തിയത്. ഇതിന് ശേഷം കയര്‍ ഒളിപ്പിച്ചു വെച്ചു. ചെങ്ങന്നൂര്‍ എസ്എച്ച്ഒ എ സി വിപിന്റെ നേതൃത്വത്തിലുള്ള അന്വേഷണത്തില്‍ കഴുത്തിലെ പാട് കണ്ടതോടെയാണ് മരണം കൊലപാതകമാണോ എന്ന സംശയം തോന്നിയത്. തുടര്‍ന്നുള്ള ചോദ്യം ചെയ്യലില്‍ പ്രതി കുറ്റം സമ്മതിച്ചു.
നിരന്തരം ഇവര്‍ തമ്മില്‍ മദ്യപിച്ച് വഴക്കിടുകയും പ്രസന്നനെ മര്‍ദ്ദിക്കുകയും ചെയ്യുന്നതിനാല്‍ പ്രസാദിനെ ഭയന്ന് പ്രസന്നന്‍ രാത്രി വൈകിയാണ് വീട്ടില്‍ എത്തുന്നത്. വീടിന്റെ രണ്ടു ഭാഗങ്ങളിലായാണ് പ്രസാദും അവിവാഹിതനായ പ്രസന്നനും താമസിച്ചിരുന്നത്. നേരം പുലര്‍ന്നപ്പോള്‍ പ്രസന്നനെ മുറിയില്‍ മരിച്ച നിലയില്‍ പിതാവ് ശ്രീധരനാണ് കണ്ടത്. ഇവരുടെ മറ്റൊരു സഹോദരനെ ഒരു വര്‍ഷം മുമ്പ് ആത്മഹത്യ ചെയ്ത നിലയില്‍ കണ്ടെത്തിയിരുന്നു. എന്നാല്‍ ഇതില്‍ എന്തെങ്കിലും ദുരൂഹതയുള്ളതായി ഇപ്പോള്‍ സംശയിക്കുന്നില്ലെന്നും പൊലീസ് പറഞ്ഞു.