അമ്മ തമിഴിലും, കുട്ടി സംസാരിച്ചത് മലയാളത്തില്‍; ഭാഷയില്‍ കണ്ടക്ടര്‍ക്ക് സംശയം; അടൂരില്‍ നിന്ന് തൃശൂരിലേക്ക് ടിക്കറ്റിന് നല്‍കിയത് 50 രൂപ; സംശയത്തിന് പിന്നാലെ ബസ് നേരെ പോലീസ് സ്റ്റേഷനിലേക്ക്; നാടോടി സ്ത്രീയില്‍ നിന്ന് മൂന്നര വയസുകാരിയെ രക്ഷിച്ച് കണ്ടക്ടര്‍
പന്തളം: തട്ടിക്കൊണ്ടുപോയ മൂന്നര വയസ്സുകാരിയെ നേരത്തെ തിരിച്ചറിയുകയും സമയം കളയാതെ പൊലീസിന്റെ കൈകളിലേല്‍പ്പിക്കുകയും ചെയ്ത കെ.എസ്.ആര്‍.ടി.സി കണ്ടക്ടര്‍ ബി. അനീഷിന്റെ പ്രവര്‍ത്തി സമൂഹത്തിന് മാതൃകയായി. പത്തനംതിട്ട ആറന്മുള എഴിക്കാട് സ്വദേശിയായ അനീഷ്, കുട്ടിയെയും തട്ടിക്കൊണ്ടുപോയവളുമായ തമിഴ്നാട് സ്വദേശിനി ദേവിയെയും പന്തളം പൊലീസിന്റെ സഹായത്തോടെ പിടികൂടുകയായിരുന്നു.
കോളത്തിന് സമീപം ബീച്ച് സന്ദര്‍ശനത്തിന് എത്തിയപ്പോഴായിരുന്നു കൊല്ലം കുന്നിക്കോട് സ്വദേശിയായ കുട്ടിയെ ദേവി (45) തട്ടിക്കൊണ്ടുപോയത്. പിന്നീട് ചെന്നൈയിലേക്കുള്ള യാത്രയ്ക്കിടയിലാണ് ഇവര്‍ അടൂര്‍ വഴി ചെങ്ങന്നൂര്‍ ഡിപ്പോയിലെ സൂപ്പര്‍ ഡീലക്സ് ബസില്‍ കയറിയത്. ദേവിയുടെയും കുട്ടിയുടെയും ഇടയിലെ ഭാഷാ വ്യത്യാസവും പെരുമാറ്റത്തിലെ അസാധാരണത്വവും കണ്ടക്ടറായ അനീഷിന്റെ ശ്രദ്ധ പിടിച്ചുപറ്റി.
50 രൂപക്ക് തൃശൂരിലേക്കാണ് യാത്രയെന്ന ദേവിയുടെ അവ്യക്ത വാദം കണക്കിലെടുത്ത അനീഷ്, കുട്ടിയോട് നേരിട്ട് സംവദിക്കുകയും സംശയം ബലപ്പെടുകയും ചെയ്തു. ഡ്രൈവറുമായും ആശയവിനിമയം നടത്തി ബസ് നേരിട്ട് പന്തളം പൊലീസ് സ്റ്റേഷനിലേക്ക് തിരിച്ചു. പോലീസ് അന്വേഷണത്തില്‍, കുട്ടിയുടെ തിരിച്ചറിയലും തിരഞ്ഞെടുത്ത വിവരങ്ങളും അടിസ്ഥാനമാക്കി കുട്ടിയെ തട്ടിക്കൊണ്ടുപോയതാണെന്ന് വ്യക്തമായി. കുട്ടിയുടെ ബന്ധുക്കള്‍ കുന്നിക്കോട് പൊലീസ് സ്റ്റേഷനില്‍ പരാതി നല്‍കിയിരുന്നു.
പന്തളം പൊലീസ് ഇന്‍സ്‌പെക്ടര്‍ ടി.ഡി. പ്രജീഷിന്റെ നേതൃത്വത്തിലുള്ള അന്വേഷണ സംഘമാണ് തുടര്‍ന്നുള്ള നടപടികള്‍ കൈക്കൊണ്ടത്. സ്ത്രീയെയും കുട്ടിയെയും മെഡിക്കല്‍ പരിശോധനയ്ക്ക് വിധേയമാക്കി നിയമ നടപടികള്‍ തുടങ്ങി. കണ്ടക്ടറായ അനീഷ് കാട്ടിയ ജാഗ്രതയും ഉത്തരവാദിത്തബോധവുമാണ് ഒരു കുഞ്ഞിന്റെ ജീവന്‍ രക്ഷിക്കാന്‍ വഴിയായത്. ഇയാളെ അഭിനന്ദനം കൊണ്ട് മൂടുകയാണ് ജനങ്ങള്‍.