ഫ്‌ളാറ്റ് മോഹിച്ച് പണം നല്‍കിയവരെ വഞ്ചിച്ച് സമ്പാദിച്ച തുക ധന്യമേരി വര്‍ഗ്ഗീസും ഭര്‍ത്താവും ഉപയോഗിച്ചത് സ്വന്തം പേരില്‍ വസ്തുക്കള്‍ വാങ്ങിക്കൂട്ടാന്‍; അന്വേഷണ ഏജന്‍സികളെ കബളിപ്പിക്കാന്‍ ചില സ്വത്തുക്കള്‍ ബെനാമി പേരിലേക്ക് മാറ്റിയെന്ന് ഇഡി; പിടിച്ചെടുത്തത് പട്ടത്തെയും കരകുളത്തെയും ഫ്‌ളാറ്റ് അടക്കം 1.56 കോടിയുടെ 13 വസ്തുവകകള്‍
തട്ടിയെടുത്ത തുകധന്യമേരി വര്‍ഗ്ഗീസും ഭര്‍ത്താവും ഉപയോഗിച്ചത് സ്വന്തം പേരില്‍ വസ്തുക്കള്‍ വാങ്ങിക്കൂട്ടാന്‍
തിരുവനന്തപുരം: ആഡംബര ഫ്‌ളാറ്റ് നിര്‍മ്മിച്ചുനല്‍കാമെന്ന മോഹന വാഗ്ദാനം നല്‍കി നടി ധന്യമേരി വര്‍ഗ്ഗീസിന്റെയും കുടുംബത്തിന്റെയും കമ്പനി, തട്ടിയെടുത്ത പണം, വകമാറ്റിയത് തന്നിഷ്ടം പോലെ വസ്തുക്കള്‍ വാങ്ങിക്കൂട്ടാനെന്ന് എന്‍ഫോഴ്‌സ്‌മെന്റ് ഡയറക്ടറേറ്റ്. സ്ഥാവരവും ജംഗമവുമായ വസ്തുക്കള്‍ പ്രതികള്‍ വാങ്ങി. ഇങ്ങനെ സ്വന്തമാക്കിയ ചില സ്വത്തുക്കള്‍ ബെനാമി കക്ഷികളുടെ പേരിലേക്ക് മാറ്റി. അന്വേഷണ ഏജന്‍സികളെ കബളിപ്പിക്കാന്‍ ലക്ഷ്യമിട്ട്സ്വത്തുക്കള്‍ മറച്ചുവയ്ക്കാനായിരുന്നു ഈ കള്ളക്കളി.
തട്ടിയെടുത്ത പണം സാംസണ്‍ ആന്‍ഡ് സണ്‍സ് ബില്‍ഡേഴ്‌സ് ആന്‍ഡ് ഡവലപ്പേഴ്‌സ് പ്രൈവറ്റ് ലിമിറ്റഡിന്റെ ബാങ്ക് അക്കൗണ്ടുകളിലേക്ക് മാറ്റി. ഫ്‌ളാറ്റ് നിര്‍മിക്കാമെന്ന വാഗ്ദാനം നല്‍കി നിഷ്‌ക്കളങ്കരായ നിക്ഷേപകരില്‍ നിന്ന് സ്വരുക്കൂട്ടിയ തുക, ഫ്‌ളാറ്റ് നിര്‍മ്മാണത്തിന് ഉപയോഗിക്കുകയോ ഫ്‌ളാറ്റുടമകള്‍ക്ക് തിരിച്ചുനല്‍കുകയോ ചെയ്തില്ല. അതുവഴി നിക്ഷേപകര്‍ക്ക് ഭീമമായ നഷ്ടമാണ് വരുത്തിയത്.
പ്രതികളുടെ തിരുവനന്തപുരം, പട്ടത്തെയും കരകുളത്തെയും ഓരോ റസിഡന്‍ഷ്യല്‍ ഫ്‌ളാറ്റും ഭൂമിയടക്കം 13 വസ്തുവകകളും അന്വഷണത്തിന്റെ ഭാഗമായി കണ്ടുകെട്ടി. കണ്ടുകെട്ടിയ വസ്തുവകകളുടെ മൊത്തം ആസ്തി മൂല്യം 1.56 കോടിയാണെന്ന് ഇഡി അറിയിച്ചു. കമ്പനി ഡയറക്ടര്‍മാരായ ജേക്കബ് സാംസണ്‍, ജോണ്‍ ജേക്കബ്, സാമുവല്‍ ജേക്കബ്, ധന്യമേരി വര്‍ഗ്ഗീസ് എന്നിവര്‍ക്കെതിരെ വഞ്ചനയും ഫണ്ട് ക്രമക്കേടും ആരോപിച്ചുള്ള പരാതികളാണ് കള്ളപ്പണം വെളുപ്പിക്കല്‍ നിയമപ്രകാരം ഇഡി അന്വേഷിച്ചത്.
പേരൂര്‍ക്കട പൊലീസ് സ്റ്റേഷനില്‍ രജിസ്റ്റര്‍ ചെയ്ത കേസ് പ്രകാരമായിരുന്നു ഇഡിയുടെ അന്വേഷണം. ഫ്‌ളാറ്റുകള്‍ നിര്‍മിച്ചു നല്‍കാമെന്നു വാഗ്ദാനം ചെയ്തു പലരില്‍ നിന്നായി വന്‍ തുക തട്ടിയെന്ന പരാതിയില്‍ താരത്തിനും സാംസണ്‍ ആന്‍ഡ് സണ്‍സ് ബില്‍ഡേഴ്‌സ് കമ്പനി ഡയറക്ടറും നടനും ധന്യയുടെ ഭര്‍ത്താവുമായ ജോണ്‍ ജേക്കബ്, ജോണിന്റെ സഹോദരന്‍ സാമുവല്‍ എന്നിവര്‍ക്കെതിരെ നിയമനടപടികള്‍ തുടര്‍ന്ന് വന്നിരുന്നു. കേസിലെ മുഖ്യപ്രതിയും കമ്പനി ചെയര്‍മാനുമായ മുട്ടട ജേക്കബ് സാംസണും കേസുമായി ബന്ധപ്പെട്ട് 2016 ല്‍ അറസ്റ്റിലായിരുന്നു.
2011 മുതല്‍ നഗരത്തിലെ വിവിധ പ്രോജക്ടുകളിലായി അഞ്ഞൂറോളം ഫ്‌ലാറ്റുകളും 20 വില്ലകളും രണ്ടു വര്‍ഷത്തിനകം പൂര്‍ത്തിയാക്കി നല്‍കാമെന്നു വാഗ്ദാനം നല്‍കി പലരില്‍ നിന്നായി 100 കോടി രൂപയും അമിത പലിശ നല്‍കാമെന്നു പറഞ്ഞു 30 കോടിയോളം രൂപയും തട്ടിച്ചെന്ന പരാതിയിലാണ് കേസ്. ഷാരോണ്‍ ഹില്‍സ്, ഓര്‍ക്കിഡ് വാലി, സാങ്ച്വറി, പേള്‍ക്രസ്റ്റ്, സെലേന്‍ അപ്പാര്ട്ട്മെന്റ്, നോവ കാസില്‍, മെരിലാന്‍ഡ്, ഗ്രീന്‍കോര്‍ട്ട് യാഡ്, എയ്ഞ്ചല്‍ വുഡ് എന്നീ പദ്ധതികളായിരുന്നു വാഗ്ദാനം നല്‍കിയിരുന്നത്.
ഉപഭോക്തൃ തര്‍ക്ക പരിഹാര കമ്മീഷന്റെ അറസ്റ്റ് വാറണ്ട്
ഫ്‌ളാറ്റ് തട്ടിപ്പ് കേസില്‍, ധന്യയും ജോണും അടക്കം നാല് പ്രമോട്ടര്‍മാര്‍ക്കെതിരെ കഴിഞ്ഞ ഒക്ടോബറില്‍, ഉപഭോക്തൃ തര്‍ക്ക പരിഹാര കമ്മീഷന്‍ അറസ്റ്റ് വാറണ്ട് പുറപ്പെടുവിച്ചിരുന്നു.
ജോണ്‍ ജേക്കബ്, ജേക്കബ് സാംസണ്‍, ധന്യ മേരി വര്‍ഗീസ്, സാമുവല്‍ ജേക്കബ് എന്നിവരാണ് പ്രൊമോട്ടര്‍മാര്‍. ഒരു അപ്പാര്ട്ട്മെന്റ് നല്‍കാത്തതിന് പരാതിക്കാരിയായ സ്ത്രീക്ക് നഷ്ടപരിഹാരം നല്‍കാനുള്ള കമ്മീഷന്റെ 2023 ഉത്തരവ് പാലിക്കുന്നതില്‍ പ്രതികള്‍ വീഴ്ച്ച വരുത്തിയതിനെ തുടര്‍ന്നാണ് വാറണ്ട് പുറപ്പെടുവിച്ചത്. നോട്ടീസ് നല്‍കിയിട്ടും പ്രതി പണം നല്‍കിയില്ല. ജസ്റ്റിസ് ബി സുധീന്ദ്രകുമാര്‍, ജുഡീഷ്യല്‍ അംഗം ഡി അജിത് കുമാര്‍, അംഗം രാധാകൃഷ്ണന്‍ കെ ആര്‍ എന്നിവരടങ്ങിയ കമ്മീഷന്‍ ബെഞ്ചാണ് വാറണ്ട് പുറപ്പെടുവിച്ചത്. സാംസണ്‍ ആന്‍ഡ് സണ്‍സ് ബില്‍ഡേഴ്സിനെതിരായ 98 കേസുകളാണ് ഇതുവരെ കമ്മീഷന്‍ തീര്‍പ്പാക്കിയത്.
പരാതിക്കാരിയായ പത്തനംതിട്ട സ്വദേശി മിനി അലക്സ് വര്‍ഗീസ് സാംസണ്‍ ആന്‍ഡ് സണ്‍സ് ബില്‍ഡേഴ്സിന്റെ പ്രോജക്റ്റില്‍ 38 ലക്ഷം രൂപ നല്‍കിയിരുന്നു. പട്ടം ടികെഡി റോഡിലുള്ള 45 സെന്റ് സ്ഥലത്താണ് സാംസണ്‍ ആന്‍ഡ് സണ്‍സ്, നോവ കാസില്‍ അപ്പാര്ട്ട്മെന്റ് പ്രോജക്ട് എന്ന പേരിലുള്ള പദ്ധതി നിര്‍ദ്ദേശിച്ചത്. കരാര്‍ പ്രകാരം യുവതിക്ക് കെട്ടിടത്തിന്റെ നാലാം നിലയില്‍ 1700 ചതുരശ്ര അടി വിസ്തീര്‍ണമുള്ള ആഡംബര അപ്പാര്ട്ട്മെന്റ് നല്‍കാനായിരുന്നു തീരുമാനം. അപ്പാര്ട്ട്മെന്റ് സമുച്ചയം നിര്‍മ്മിച്ച ഭൂമിയില്‍ 1.15 സെന്റ് അവിഭക്ത പലിശയും വാഗ്ദാനം ചെയ്തു.
2014 ഡിസംബര്‍ 31നകം അപ്പാര്ട്ട്മെന്റ് കൈമാറുമെന്ന വാഗ്ദാനം പ്രതികള്‍ പാലിച്ചില്ല. മാത്രമല്ല, പരാതിക്കാരനെയോ മറ്റ് വാങ്ങുന്നവരെയോ അറിയിക്കാതെയാണ് പ്രതികള്‍ കേരള ഫിനാന്‍ഷ്യല്‍ കോര്‍പ്പറേഷനില്‍ (കെഎഫ്സി) വസ്തു പണയം വച്ച്് വായ്പ നേടിയത്.
അതേസമയം നിര്‍മാണം പൂര്‍ത്തീകരിക്കുന്നതില്‍ തങ്ങളുടെ ഭാഗത്തുനിന്ന് മനഃപൂര്‍വമായ കാലതാമസം ഉണ്ടായിട്ടില്ലെന്നാണ് പ്രതികളുടെ വാദം. തൊഴില്‍ പ്രശ്നങ്ങള്‍, ആഗോള മാന്ദ്യം മൂലം നിര്‍മാണ സാമഗ്രികളുടെ വില വര്‍ധനവ്, കെട്ടിട നിര്‍മാണ ചട്ടങ്ങളിലും മറ്റും വന്ന മാറ്റങ്ങള്‍ തുടങ്ങിയവ കാരണമാണ് കാലതാമസം ഉണ്ടായതെന്ന് അവര്‍ കമ്മീഷനു മുന്നില്‍ വാദിച്ചു. ലോറി തൊഴിലാളി സമരം, മണലിന്റെ വിലവര്‍ധ തുടങ്ങിയ നിര്‍മാണ സാമഗ്രികളുടെ ദൗര്‍ലഭ്യം, കല്ലിന്റെ ദൗര്‍ലഭ്യം തുടങ്ങിയവയാണ് മറ്റ് കാരണങ്ങളായി പറഞ്ഞിരിക്കുന്നത്.
എന്നാല്‍, കമ്മിഷന്‍ ഹര്‍ജിക്കാരന് അനുകൂലമായി വിധി പറയുകയായിരുന്നു. 2014 ഡിസംബര്‍ 31 മുതല്‍ വാങ്ങിയ തുകയായ 38 ലക്ഷം രൂപ 8 ശതമാനം വാര്‍ഷിക പലിശ സഹിതം തിരിച്ചടയ്ക്കാന്‍ പ്രോജക്ട് പ്രൊമോട്ടര്‍മാരോട് കമ്മീഷന്‍ നിര്‍ദേശിച്ചു. നഷ്ടപരിഹാരമായി 7 ലക്ഷം രൂപ നല്‍കാനും നിര്‍ദേശിച്ചു.
അതേസമയം സമാനമായ സംഭവത്തില്‍ 2016 ല്‍ ഫ്‌ലാറ്റ് നിര്‍മ്മിച്ച് നല്‍കാമെന്ന് വാഗ്ദാനം ചെയ്ത് അമ്പതിലേറെ പേരില്‍ നിന്ന് കോടികള്‍ തട്ടിയെന്ന കേസില്‍ ധന്യയുടെ ഭര്‍തൃപിതാവ് ജേക്കബ് സാംസണ്‍ അറസ്റ്റിലായിരുന്നു. ഇതോടെയാണ് ഞെട്ടിപ്പിക്കുന്ന തട്ടിപ്പ് കഥ പുറംലോകത്ത് എത്തിയത്. സാംസണ്‍ ആന്‍ഡ് സണ്‍സ് ബില്‍ഡേഴ്‌സ് ഡവലപ്പേഴ്‌സ് പ്രൈവറ്റ് ലിമിറ്റഡ് എന്ന സ്ഥാപനത്തിന്റെ പേരിലാണ് പണം തട്ടിയത്. പ്രസ്തുത കമ്പനിയുടെ സെല്‍സ് വിഭാഗം ഡയറക്ടറായിരുന്നു ധന്യമേരി വര്‍ഗ്ഗീസ്.
മ്യൂസിയം, കന്റോണ്‍മെന്റ്, പേരൂര്‍ക്കട പൊലീസ് സ്റ്റേഷനുകളില്‍ ലഭിച്ച പരാതിയുടെ അടിസ്ഥാനത്തിലാണ് തട്ടിപ്പിനെതിരെ കേസെടുത്തത്. 2011ല്‍ മരപ്പാലത്ത് നോവ കാസില്‍ എന്ന ഫല്‍റ്റ് നിര്‍മ്മിച്ച് നല്‍കാമെന്ന് പറഞ്ഞ് പലരില്‍ നിന്നായി ഇവര്‍ അഡ്വാന്‍സ് തുക കൈപ്പറ്റിയിരുന്നു.