മലേഷ്യയിലേക്ക് അയച്ച പെയിന്റിങ്ങുകള്‍ക്കൊപ്പം ലഹരി മരുന്നെന്ന് ഭീഷണി; വെര്‍ച്വല്‍ അറസ്റ്റ് ചെയ്ത് ചോദ്യം ചെയ്തത് മൂന്നു മണിക്കൂര്‍: അന്തരിച്ച പ്രമുഖ മലയാളി ചിത്രകാരന്റെ ഭാര്യയെ കബളിപ്പിച്ച് തട്ടിയത് 80 ലക്ഷം രൂപ

പാലക്കാട്: അന്തരിച്ച പ്രമുഖ മലയാളി ചിത്രകാരന്റെ ഭാര്യയെ വെര്‍ച്വല്‍ അറസ്റ്റിലെന്ന് തെറ്റിദ്ധരിപ്പിച്ച് 80 ലക്ഷം രൂപ തട്ടിയെടുത്തു. മലേഷ്യയിലേക്ക് അയച്ച പെയിന്റിങ്ങുകള്‍ക്കൊപ്പം ലഹരി മരുന്നും ഉണ്ടായിരുന്നതായി ഭീഷണിപ്പെടുത്തിയാണ് പണം തട്ടിയത്. ബെംഗളൂരുവില്‍ താമസിക്കുന്ന മലയാളി വനിതയാണ് തട്ടിപ്പിന് ഇരയായത്. ഇവരുടെ പരാതിയില്‍ ബെംഗളൂരു പൊലീസിന്റെ സൈബര്‍ ക്രൈം സ്‌ക്വാഡ് അന്വേഷണം തുടങ്ങി.

ഈ മാസം 20നാണ് സംഭവം. ചാവക്കാട് സ്വദേശിയായ അന്തരിച്ച പ്രമുഖ ചിത്രകാരന്റെ ഭാര്യയാണ് തട്ടിപ്പിന് ഇരയായത്. സംഘം ഭീഷണിപ്പെടുത്തിയിരുന്നതിനാല്‍ ഇവര്‍ ഈ വിവരം പുറത്ത് ആരോടും പറഞ്ഞിരുന്നില്ല. ആലത്തൂരിലുള്ള ബന്ധുവിനോടു വിവരം പറഞ്ഞപ്പോഴാണ് അറസ്റ്റ് തട്ടിപ്പാണെന്നു വ്യക്തമായത്. തുടര്‍ന്നു കഴിഞ്ഞദിവസം ബെംഗളൂരു സിറ്റി പൊലീസില്‍ പരാതി നല്‍കുകയായിരുന്നു.

ലോകത്തിലെ വിവിധയിടങ്ങളില്‍ ഇവര്‍ ഭര്‍ത്താവിന്റെ പെയിന്റിങ്ങുകള്‍ ലേലത്തില്‍ വെയ്ക്കാറുണ്ട്. അടുത്തിടെ മലേഷ്യയിലേക്ക് കയറ്റി അയച്ച പെയിന്റിങ്ങിനുള്ളില്‍ മയക്കു മരുന്നുണ്ടെന്ന് ഭീഷണിപ്പെടുത്തിയായിരുന്നു തട്ടിപ്പ്. ഭയന്നു പോയ ഇവര്‍ പണം നല്‍കുക ആയിരുന്നു. ഇത്തരത്തില്‍ ഭര്‍ത്താവിന്റെ പെയിന്റിങ്ങുകള്‍ ലേലത്തില്‍ വിറ്റുകിട്ടിയ തുകയാണു നഷ്ടമായതെന്നു പരാതിയില്‍ പറയുന്നു. അടുത്തിടെ വില്‍പനയ്ക്കായി കുറച്ചു പെയിന്റിങ് കുറിയര്‍ വഴി മലേഷ്യയിലേക്ക് അയച്ചു. ഇതില്‍ ലഹരിമരുന്നു കണ്ടെത്തിയെന്നു പറഞ്ഞാണു സിബിഐ ഉദ്യോഗസ്ഥരെന്നു പരിചയപ്പെടുത്തിയ സംഘം ഫോണില്‍ വിളിച്ചത്.

ആദ്യം സംഘം ഇവരെ വെര്‍ച്വല്‍ അറസ്റ്റിലെന്ന് ഭീഷണിപ്പെടുത്തി മുറിക്കുള്ളില്‍ ഇരുത്തി. വെള്ളം പോലം കുടിക്കാന്‍ സമ്മതിച്ചില്ല. തുടര്‍ന്ന ഉന്നത സിബിഐ ഉദ്യോഗസ്ഥര്‍, ജഡ്ജി എന്നൊക്കെ പരിചയപ്പെടുത്തി വാട്‌സാപ് വിഡിയോ കോളും എത്തി. ഹിന്ദിയിലും ഇംഗ്ലിഷിലുമായിരുന്നു ചോദ്യംചെയ്യല്‍. മുറിയില്‍ നിന്നു പുറത്തുപോകാനാ കോള്‍ കട്ട് ചെയ്യാനോ സമ്മതിച്ചില്ല. അങ്ങനെ ചെയ്താല്‍ അറസ്റ്റ് ചെയ്തു മാധ്യമങ്ങളില്‍ വാര്‍ത്ത നല്‍കുമെന്നു ഭീഷണിപ്പെടുത്തി. ഇതോടെ ഇവര്‍ കൂടുതല്‍ ഭയന്നു.

വെള്ളംകുടിക്കാനോ ഭക്ഷണം കഴിക്കാനോ പോലും അനുവദിക്കാതെ മൂന്നു മണിക്കൂര്‍ ചോദ്യംചെയ്യല്‍ തുടര്‍ന്നതായി പരാതിയില്‍ പറയുന്നു. പിന്നീട് അറസ്റ്റ് രേഖപ്പെടുത്തിയതായി അറിയിക്കുകയും കേസില്‍ നിന്ന് ഒഴിവാക്കാന്‍ ഒരു കോടി രൂപ നല്‍കണമെന്ന് ആവശ്യപ്പെടുകയും ചെയ്തു. 80 ലക്ഷം രൂപ മാത്രമേ അക്കൗണ്ടില്‍ ഉള്ളൂ എന്ന് അറിയിച്ചതോടെ ആ പണം ഗഡുക്കളായി അയയ്ക്കാന്‍ ആവശ്യപ്പെട്ടു. 8 തവണകളായി ഡല്‍ഹിയിലുള്ള 8 അക്കൗണ്ടുകളിലേക്കാണു പണം കൈമാറിയതെന്നു പരാതിയിലുണ്ട്.

പണം കൈമാറിയ വിവരം ആരോടെങ്കിലും പറഞ്ഞാല്‍ അറസ്റ്റ് ചെയ്യുമെന്നും സംഘം ഭീഷണിപ്പെടുത്തി. അതുകൊണ്ട് തന്നെ പണം നഷ്ടമായ വിവരം ഇവര്‍ ആരോടും പറഞ്ഞതുമില്ല. കഴിഞ്ഞദിവസമാണ് ഇവര്‍ ബന്ധുവിനോട് ഇക്കാര്യം പറഞ്ഞത്. ഇതോടെയാണ് തട്ടിപ്പ് തിരിച്ചറിഞ്ഞതും പോലിസില്‍ പരാതി നല്‍കിയതും.