'ടെറസിലേക്ക് വിളിച്ചുകൊണ്ടുപോയി ലൈംഗികമായി പീഡിപ്പിച്ചു; നിസഹായാവസ്ഥ ചൂഷണം ചെയ്തു; വാര്‍ത്തയും കേസും ആകുമോ എന്ന് പേടിച്ച് ഉമേഷ് പറഞ്ഞത് അനുസരിക്കേണ്ടി വന്നു'; ഡിവൈഎസ്പി ഉമേഷിനെതിരെ യുവതിയുടെ മൊഴി; ഉമേഷിനെ കുരുക്കുന്ന ഈ നിര്‍ണായക റിപ്പോര്‍ട്ട് പോലീസ് മേധാവിക്ക് കൈമാറി

പാലക്കാട്: ചെര്‍പ്പുളശ്ശേരി എസ്എച്ച്ഒ ആയിരുന്ന ബിനു തോമസ് ജീവനൊടുക്കും മുമ്പ് എഴുതിയ കുറിപ്പിലെ പരാമര്‍ശത്തില്‍ യുവതിയുടെ മൊഴിയിലെ കൂടുതല്‍ വിവരങ്ങള്‍ പുറത്ത്. ആത്മഹത്യാ കുറിപ്പില്‍ പറയുന്ന കാര്യങ്ങള്‍ ശരിവെക്കുന്ന വിധത്തിലാണ് യുവതി മൊഴി നല്‍കിയിരിക്കുന്നത്. ഡിവൈഎസ്പി ഉമേഷിനെതിരെ ഗുരുതര ആരോപണങ്ങളാണ് യുവതിയുടെ മൊഴിയിലുള്ളത്. അനാശാസ്യക്കേസില്‍ തന്റെ കൂടെ പിടിയിലായവരില്‍ നിന്ന് ഉമേഷ് പണം വാങ്ങിയെന്നും പണം നല്‍കിയില്ലെങ്കില്‍ കേസ് എടുക്കുമെന്ന് ഭീഷണിപ്പെടുത്തിയെന്നും യുവതി പൊലീസിന് മൊഴി നല്‍കി.

2014ല്‍ അനാശാസ്യത്തിനിടെ പിടിയിലായ യുവതിയെ, അന്ന് സിഐ ആയിരുന്ന ഉമേഷ് വീട്ടിലെത്തി പീഡിപ്പിച്ചുവെന്നാണ് ബിനു ആത്മഹത്യാക്കുറിപ്പില്‍ കുറിച്ചത്. ഡിവൈഎസ്പി ഉമേഷ് അന്ന് മറ്റ് പ്രതികളില്‍ നിന്ന് പണം വാങ്ങിയിരുന്നെങ്കിലും, തന്റെ കയ്യില്‍ നിന്നും പണം വാങ്ങിയില്ലെന്ന് യുവതി പറയുന്നു. എന്നാല്‍ വടക്കഞ്ചേരി സിഐയായിരുന്ന കാലത്ത് തന്നെ ലൈംഗികമായി പീഡിപ്പിച്ചെന്നാണ് യുവതിയുടെ ആരോപണം. കേസുമായി ബന്ധപ്പെട്ട് വീട്ടിലെത്തിയ ഉമേഷ് ക്രൂരമായി പെരുമാറി.

ഉമേഷ് വന്ന സമയത്ത് രണ്ട് പെണ്‍കുഞ്ഞുങ്ങളും വീട്ടില്‍ ഉണ്ടായിരുന്നു. ഉമേഷ് ടെറസിന്റെ മുകളിലേക്ക് കൂട്ടിക്കൊണ്ടു പോയി. കൂടെ പോവുകയല്ലാതെ മറ്റു വഴികള്‍ ഉണ്ടായിരുന്നില്ല. വാര്‍ത്തയും കേസും ആകുമോ എന്ന് പേടിച്ച് ഉമേഷ് പറഞ്ഞത് അനുസരിക്കേണ്ടി വന്നു. ഉമേഷ് ടെറസില്‍ വെച്ച് പീഡിപ്പിച്ചെന്നും തന്റെ നിസഹായാവസ്ഥയെ ചൂഷണം ചെയ്യുകയായിരുന്നെന്നും യുവതി മൊഴി നല്‍കി.

ഉമേഷിനെ കുരുക്കുന്ന ഈ നിര്‍ണായക റിപ്പോര്‍ട്ട് പൊലീസ് മേധാവിക്ക് കൈമാറി. യുവതിയുടെ മൊഴിയുടെ അടിസ്ഥാനത്തില്‍ ഡിവൈഎസ്പി ഉമേഷിനെതിരെ ഉടന്‍ കേസെടുത്തേക്കും. യുവതിയുടെ മൊഴിയുടെ അടിസ്ഥാനത്തില്‍ പാലക്കാട് ജില്ലാ പൊലീസ് മേധാവി ഡിവൈഎസ്പിക്കെതിരെ നടപടിക്ക് ശുപാര്‍ശ ചെയ്തിട്ടുണ്ട്.

പ്രാഥമിക റിപ്പോര്‍ട്ട് ലഭിച്ചതായി ഡിജിപി റവാഡ ചന്ദ്രശേഖര്‍ വ്യക്തമാക്കി. വിഷയത്തില്‍ വിശദമായ അന്വേഷണം നടത്തുമെന്നും അദ്ദേഹം അറിയിച്ചു. ചെറുപ്പുളശ്ശേരി എസ്.എച്ച്.ഒ ആത്മഹത്യ ചെയ്ത സംഭവത്തില്‍ ഉമേഷിനെതിരെ ആരോപണം ഉയര്‍ന്നതിനെത്തുടര്‍ന്നാണ് ക്രൈംബ്രാഞ്ച് അന്വേഷണം ആരംഭിച്ചത്. യുവതിയുടെ മൊഴിയും ക്രൈംബ്രാഞ്ച് റിപ്പോര്‍ട്ടും ഡിവൈഎസ്പി ഉമേഷിനെതിരെ നിര്‍ണായക തെളിവുകളാകും.

അതേസമയം ആരോപണങ്ങള്‍ വാസ്തവ വിരുദ്ധമാണെന്നായിരുന്നു ഡിവൈഎസ്പി ഉമേഷിന്റെ പക്ഷം. ആത്മഹത്യാക്കുറിപ്പ് കണ്ടിട്ടില്ല. അതില്‍ പറയുന്ന കാര്യങ്ങള്‍ എന്നെക്കുറിച്ചാണോയെന്നറിയില്ല. ഉന്നത ഉദ്യോഗസ്ഥരാരും തന്നോട് ഇതിനെക്കുറിച്ച് പറഞ്ഞിട്ടില്ലെന്നും ഉമേഷ് പ്രതികരിച്ചു. ബിനു തോമസിന്റെ 35 പേജടങ്ങുന്ന ആത്മഹത്യാക്കുറിപ്പിലാണ് നിര്‍ണായക വിവരങ്ങളുള്ളത്. നാല്, അഞ്ച്, ആറ് പേജിലാണ് ആരോപണങ്ങളുള്ളത്. 2015ലായിരുന്നു സംഭവം. ബിനുവിനെ ഈ മാസം പതിനഞ്ചിനാണ് ക്വാര്‍ട്ടേഴ്‌സില്‍ തൂങ്ങിമരിച്ച നിലയില്‍ കണ്ടെത്തിയത്.

ഡ്യൂട്ടിക്കിടെ വിശ്രമിക്കാനെന്ന് പറഞ്ഞ് ക്വാര്‍ട്ടേഴ്സിലേക്ക് പോയതായിരുന്നു ബിനു. തിരികെ എത്താതായതോടെ സഹപ്രവര്‍ത്തകര്‍ ചെന്നുനോക്കിയപ്പോഴാണ് തൂങ്ങിയ നിലയില്‍ കണ്ടത്. മൃതദേഹത്തിന് സമീപത്തുനിന്ന് ആത്മഹത്യാക്കുറിപ്പും കിട്ടിയിരുന്നു.കുടുംബപരമായ പ്രശ്‌നങ്ങളാണ് ആത്മഹത്യയ്ക്ക് കാരണമെന്നായിരുന്നു ആദ്യം പൊലീസ് പറഞ്ഞത്. എന്നാല്‍ ജോലിസംബന്ധമായ പ്രശ്‌നങ്ങളുമുണ്ടെന്ന് നേരത്തെ തന്നെ ആരോപണമുയര്‍ന്നിരുന്നു. ഇതിനിടയിലാണ് ആത്മഹത്യാക്കുറിപ്പ് പുറത്തുവന്നത്. ആറുമാസം മുന്‍പാണ് സ്ഥലം മാറ്റം ലഭിച്ച് ബിനുതോമസ് ചെര്‍പ്പുളശ്ശേരിയില്‍ എത്തിയത്.