എക്‌സൈസിന്റെ ഓപ്പറേഷന്‍ ക്ലീന്‍ സ്ലേറ്റ്; 6506 റെയ്ഡുകള്‍; 901 പ്രതികള്‍; പരിശോധിച്ചത് 60,240 വാഹനങ്ങള്‍; മയക്കുമരുന്ന് കടത്തുകയായിരുന്ന 46 വാഹനങ്ങള്‍ പിടികൂടി; സംസ്ഥാനത്ത് എക്‌സൈസ് രണ്ടാഴ്ചക്കിടെ പിടിച്ചെടുത്ത് 2.37 കോടിയുടെ ലഹരി വസ്തുക്കള്‍
തിരുവനന്തപുരം: സംസ്ഥാനത്ത് രണ്ടാഴ്ചക്കിടെ പിടിച്ചെടുത്ത് 2.37 കോടിയുടെ ലഹരി വസ്തുക്കള്‍. മയക്കുമരുന്നിനെതിരേ എക്‌സൈസിന്റെ ഓപ്പറേഷന്‍ ക്ലീന്‍ സ്ലേറ്റിലൂടെ നടത്തുന്ന പരിശോധനയിലാണ് ഇത്രയധികം മയക്കുമരുന്നുകള്‍ പിടികൂടിയതായി റിപ്പോര്‍ട്ട് വന്നത്. മാര്‍ച്ച് അഞ്ചു മുതല്‍ 19 വരെയുള്ള കണക്കാണിത്. രണ്ടാഴ്ചയ്ക്കിടെ പിടിയിലായത് 873 പേര്‍. ആകെ 874 കേസുകളില്‍ 901 പേരാണ് പ്രതികള്‍.
എക്‌സൈസ് മാത്രം നടത്തിയത് 6506 റെയ്ഡുകളാണ്. മറ്റു സേനകളുമായി ചേര്‍ന്ന് 177 പരിശോധനകളും നടത്തി. 60,240 വാഹനങ്ങള്‍ പരിശോധിച്ചു. മയക്കുമരുന്ന് കടത്തുകയായിരുന്ന 46 വാഹനങ്ങള്‍ പിടിച്ചു. ഒളിവിലിരുന്ന 49 പ്രതികളെയും പിടികൂടിയിട്ടുണ്ട്. 2.37 കോടിയുടെ ലഹരിവസ്തുക്കളാണ് പിടിച്ചത്.
123.88 ഗ്രാം എംഡിഎംഎ, 40.5 ഗ്രാം മെത്താഫിറ്റമിന്‍, 12.82 ഗ്രാം നെട്രോസെഫാം ഗുളികകള്‍, 14.5 ഗ്രാം ബ്രൗണ്‍ ഷുഗര്‍, 60.8 ഗ്രാം ഹെറോയിന്‍, 31.7 ഗ്രാം ഹാഷിഷ് ഓയില്‍, 179.35 കിലോ കഞ്ചാവ്, 148 കിലോ കഞ്ചാവ് കലര്‍ത്തിയ ചോക്കലേറ്റ് എന്നിവ പിടികൂടിയെന്ന് മന്ത്രി എം.ബി. രാജേഷ് അറിയിച്ചു.