ഐബി ഉദ്യേഗസ്ഥ മരിച്ച സംഭവത്തില്‍ പ്രതി എന്ന് സംശയിക്കുന്ന സുകാന്തിന്റെ വീട്ടില്‍ പോലീസ് പരിശോധന; മുറിയുടെ വാതിലിന്റെയും അലമാരയുടെയും പൂട്ട് തകര്‍ത്തു; ഹാര്‍ഡ് ഡിസ്‌കും പാസ്ബുക്കും കണ്ടെടുത്തു
എടപ്പാള്‍: റെയില്‍വേ ട്രാക്കില്‍ മരിച്ച നിലയില്‍ കണ്ടെത്തപ്പെട്ട ഇമിഗ്രേഷന്‍ ഇന്റലിജന്‍സ് ബ്യൂറോ (ഐബി) ഉദ്യോഗസ്ഥയുടെ മരണവുമായി ബന്ധപ്പെട്ട കേസില്‍ പ്രതിയെന്ന് സംശയിക്കുന്ന ഐബി ഉദ്യോഗസ്ഥന്‍ സുകാന്ത് സുരേഷ്നയുടെ എടപ്പാളിലുള്ള വീട്ടില്‍ പൊലീസ് പരിശോധന നടത്തി. തിരുവനന്തപുരത്തെ പേട്ട പൊലീസ് ആണ് പരിശോധനയ്ക്ക് നേതൃത്വം നല്‍കിയത്.
സംഭവം വാര്‍ത്തയായതോടെ സുകാന്തിന്റെ കുടുംബം വീടുപൂട്ടി വിട്ടുമാറിയിരുന്നു. ഇന്നലെ വൈകിട്ട് 3.30ന് അന്വേഷണ സംഘം വീട്ടിലെത്തി അയല്‍വാസികള്‍ക്കു ഏല്‍പ്പിച്ചിരുന്ന താക്കോല്‍ വാങ്ങി വീടുതുറന്നാണ് പരിശോധന നടത്തിയത്. ഇയാളുടെ സ്വകാര്യ മുറിയിലെ വാതിലും അലമാരയും തുറന്ന ശേഷം ഹാര്‍ഡ് ഡിസ്‌ക്, രണ്ട് പാസ്ബുക്കുകള്‍, മറ്റ് രേഖകള്‍ എന്നിവ പോലീസ് കണ്ടെടുത്തുവെന്ന് ഉദ്യോഗസ്ഥര്‍ അറിയിച്ചു.
പേട്ട എസ്ഐ ബാലു, സിവില്‍ പൊലീസ് ഓഫീസര്‍ അന്‍സാര്‍, ചങ്ങരംകുളം സ്റ്റേഷനിലെ സീനിയര്‍ സിപിഒ സബീഷ് എന്നിവരുടെ നേതൃത്വത്തിലാണ് പരിശോധന പുരോഗമിച്ചത്. ഇടപെടലിനായി വാര്‍ഡ് മെമ്പര്‍ ഇ.എസ്. സുകുമാരനും സംഘത്തിനൊപ്പമുണ്ടായിരുന്നു.
വീട് ഉപേക്ഷിച്ച സമയത്ത് അവിടെ നിലനിന്നിരുന്ന വളര്‍ത്തുമൃഗങ്ങളെ പഞ്ചായത്ത് ഇടപെട്ട് സുരക്ഷിതമായി മാറ്റിയതായും അധികൃതര്‍ വ്യക്തമാക്കി. സംഭവവുമായി ബന്ധപ്പെട്ട് വിശദമായ അന്വേഷണമാണ് ഇപ്പോള്‍ തുടരുന്നത്.