പ്രണയിച്ച സന്ദീപുമായി വിവാഹം ഉറപ്പിച്ചു; രാവിലെ വീട്ടിലെത്തി യുവാവ് സംസാരിച്ച് മടങ്ങിയതിന് പിന്നാലെ ഐ.ടി.ഐ വിദ്യാര്‍ഥിനിയുടെ ആത്മഹത്യ; നെടുമങ്ങാട്ടെ നമിതയുടെ മരണത്തില്‍ പ്രതിശ്രുത വരനെ കസ്റ്റഡിയിലെടുത്ത് പൊലീസ്

തിരുവനന്തപുരം: നെടുമങ്ങാട് വഞ്ചുവത്ത് ഐ.ടി.ഐ വിദ്യാര്‍ഥിനി വീട്ടിനുള്ളില്‍ തൂങ്ങിമരിച്ച നിലയില്‍ കണ്ടെത്തിയ സംഭവത്തില്‍ പ്രതിശ്രുത വരനായ സന്ദീപിനെ കസ്റ്റഡിയിലെടുത്ത് പൊലീസ്. നമിതയുമായി വിവാഹം ഉറപ്പിച്ചിരുന്ന സന്ദീപ് എന്ന യുവാവ് ഇന്നലെ രാവിലെ വീട്ടിലെത്തി സംസാരിച്ച് മടങ്ങിയിരുന്നു. ഇതിന് പിന്നാലെയാണ് 19കാരിയെ വീടിനുള്ളില്‍ തൂങ്ങി മരിച്ച നിലയില്‍ കണ്ടെത്തിയത്.

വലിയമല പോലീസ് സ്റ്റേഷന്‍ പരിധിയിലാണ് സംഭവം. നമിതയുമായി വിവാഹം ഉറപ്പിച്ചിരുന്ന സന്ദീപ് വീട്ടിലെത്തി മടങ്ങിയതിന് പിന്നാലെ നമിതയെ ഫോണില്‍ കിട്ടാതായി. ഇതോടെ സന്ദീപ് തിരികെ വന്നു. അപ്പോഴാണ് നമിതയെ തൂങ്ങി മരിച്ച നിലയില്‍ കണ്ടത്. വീട്ടില്‍ സംഭവസമയം മറ്റാരും ഉണ്ടായിരുന്നില്ല. ഉടന്‍ തന്നെ സന്ദീപ് നാട്ടുകാരെ വിവരമറിയിച്ചു.

നമിതയെ നെടുമങ്ങാട് ജില്ലാ ആശുപത്രിയില്‍ എത്തിച്ചെങ്കിലും മരിച്ചിരുന്നു. സമീപത്തെ കോഴി ഫാമിലെ ജീവനക്കാരിയാണ് നമിതയുടെ അമ്മ. ആര്യനാട് ഗവ. ഐ.ടി.ഐ ഇലക്ട്രോണിക്സ് രണ്ടാം വര്‍ഷ വിദ്യാര്‍ഥിനിയാണ് നമിത. സന്ദീപും നമിതയും പ്രണയത്തിലായിരുന്നുവെന്നാണ് വിവരം.