ക്ഷയ രോഗബാധിതനായി കിടപ്പില്‍; പിതാവിന് അനക്കമില്ലെന്ന് പറഞ്ഞ് സഹോദരിയുടെ വീട്ടിലെത്തി; സ്വാഭാവിക മരണമാക്കാന്‍ നീക്കം; വാരിയെല്ലുകള്‍ക്ക് ഒടിവ് സംഭവിച്ചതായി പോസ്റ്റ് മോര്‍ട്ടത്തില്‍ തെളിഞ്ഞത് കുരുക്കായി; പെരുമ്പാവൂരില്‍ മദ്യലഹരിയില്‍ അച്ഛനെ ചവിട്ടി കൊന്ന മകന്‍ അറസ്റ്റില്‍
പെരുമ്പാവൂരില്‍ മദ്യലഹരിയില്‍ അച്ഛനെ ചവിട്ടി കൊന്ന മകന്‍ അറസ്റ്റില്‍
കൊച്ചി: മദ്യലഹരിയില്‍ അച്ഛനെ ചവിട്ടിക്കൊലപ്പെടുത്തിയ മകന്‍ അറസ്റ്റില്‍. ചേലാമറ്റം നാല് സെന്റ് കോളനിയില്‍ തെക്കുംതല വീട്ടില്‍ ജോണി (67) ആണ് മരിച്ചത്. സംഭവത്തില്‍ ജോണിയുടെ മകന്‍ മെല്‍ജോയെ പെരുമ്പാവൂര്‍ പൊലീസ് അറസ്റ്റ് ചെയ്തു. ക്ഷയ രോഗബാധിതനായിരുന്ന ജോണി കുറച്ചുനാളുകളായി കിടപ്പിലായിരുന്നു.
ബുധനാഴ്ച രാത്രി ഒന്‍പതരയോടെ പിതാവിന് അനക്കമില്ലെന്ന് പറഞ്ഞ് മെല്‍ജോ സഹോദരിയുടെ വീട്ടിലെത്തി. ഉടനെ സഹോദരി എത്തി പിതാവിനെ പെരുമ്പാവൂര്‍ താലൂക്ക് ആശുപത്രിയില്‍ എത്തിച്ചെങ്കിലും നേരത്തെ മരണം സംഭവിച്ചിരുന്നതായി ഡോക്ടര്‍മാര്‍ പറഞ്ഞു.
പിന്നീട് ഇന്നു രാവിലെ പോസ്റ്റ്‌മോര്‍ട്ടം നടത്തിയപ്പോള്‍ ജോണിയുടെ രണ്ട് വാരിയെല്ലുകള്‍ക്കും ഒടിവ് സംഭവിച്ചതായി കണ്ടെത്തി. തുടര്‍ന്ന് സംശയം തോന്നിയ പെരുമ്പാവൂര്‍ പൊലീസ് മെല്‍ജോയെ കസ്റ്റഡിയിലെടുത്ത് ചോദ്യം ചെയ്തപ്പോള്‍ മദ്യലഹരിയില്‍ താന്‍ പിതാവിനെ ചവിട്ടിയതായി ഇയാള്‍ പൊലീസിനോട് സമ്മതിച്ചു. തുടര്‍ന്ന് ഇയാള്‍ക്കെതിരെ കൊലപാതക കുറ്റത്തിന് കേസെടുത്തു പെരുമ്പാവൂര്‍ പൊലീസ് അറസ്റ്റ് രേഖപ്പെടുത്തി.