മലപ്പുറത്ത് നിര്‍മാണം നടക്കുന്ന ആറു വരി ദേശീയപാത സര്‍വീസ് റോഡിലേക്ക് ഇടിഞ്ഞുവീണു; സംരക്ഷണ ഭിത്തി ഇടിഞ്ഞുവീണത് മൂന്ന് കാറുകള്‍ക്ക് മുകളിലേക്ക്; ആളപായമില്ല; ഗതാഗതം പൂര്‍ണമായും തടസപ്പെട്ടു
ദേശീയപാത സര്‍വീസ് റോഡിലേക്ക് ഇടിഞ്ഞുവീണു
മലപ്പുറം: മലപ്പുറത്ത് കൂരിയാടിനും കൊളപ്പുറത്തിനും ഇടയില്‍ നിര്‍മാണം പുരോഗമിക്കുന്ന ദേശീയപാത 66 സര്‍വീസ് റോഡിലേക്ക് ഇടിഞ്ഞുവീണ് അപകടം. കൂരിയാട് സര്‍വീസ് സ്റ്റേഷന് സമീപം ദേശീയപാതയുടെ ഒരുഭാഗം സര്‍വീസ് റോഡിലേക്ക് ഇടിഞ്ഞുവീഴുകയായിരുന്നു. വളരെ ഉയരത്തില്‍നിന്നാണ് താഴ്ചയിലുള്ള സര്‍വീസ് റോഡിലേക്ക് മണ്ണിടിഞ്ഞ് വീണത്. തിങ്കള്‍ പകല്‍ 2.30ഓടെയാണ് അപകടം.
തൃശൂര്‍ ഭാഗത്തേക്ക് പോകുന്ന സര്‍വീസ് റോഡിലേക്കാണ് മണ്ണിടിഞ്ഞത്. മൂന്ന് കാറുകള്‍ക്ക് മുകളിലേക്കാണ് മണ്ണ് വീണതെങ്കിലും ആളപായമില്ല. പാതയില്‍ ഗതാഗതം പൂര്‍ണമായും തടസപ്പെട്ടു. ദേശീയപാതയില്‍ നിര്‍മാണപ്രവൃത്തി നടത്തുന്ന ജെസിബിയും അപകടത്തില്‍പ്പെട്ടു.
സര്‍വീസ് റോഡിലൂടെ യാത്ര ചെയ്തിരുന്ന കാറിന് മുകളിലേക്കാണ് ആറുവരിപ്പാതയുടെ സംരക്ഷണ ഭിത്തി ഇടിഞ്ഞുവീണത്. മൂന്ന് കാറുകളാണ് അപകടത്തില്‍ പെട്ടത്. രണ്ട് വാഹനങ്ങളുടെ മുകളിലേക്ക് കല്ലും മണ്ണും പതിച്ചു. സംഭവത്തില്‍ ഇതുവരെ ആളപായം റിപ്പോര്‍ട്ട് ചെയ്തിട്ടില്ല.
കൊളപ്പുറം കക്കാട് വഴി കോഴിക്കോട് നിന്നും തൃശ്ശൂര്‍ ഭാഗത്തേക്കുള്ള ഗതാഗതം പൂര്‍ണമായും തടസ്സപ്പെട്ടു. വാഹനങ്ങള്‍ വികെ പടിയില്‍നിന്നും മമ്പുറം വഴി കക്കാട് വഴി പോകേണ്ടതാണെന്ന് അധികൃതര്‍ അറിയിച്ചു.