മാഞ്ചസ്റ്റര്‍ സിനഗോഗില്‍ ഭീകരാക്രമണം: കൊല്ലപ്പെട്ട ഡോള്‍ബിയും ക്രാവിറ്റ്സും ജൂത കൂട്ടായ്മയിലെ അംഗങ്ങള്‍; ആക്രമണം നടത്തിയ പ്രതി സിറിയന്‍ വംശജനായ ബ്രിട്ടീഷ് പൗരന്‍; കൂടുതല്‍ വിവരങ്ങള്‍ പുറത്തുവിട്ട് പോലീസ്
ലണ്ടന്‍: വടക്കന്‍ മാഞ്ചസ്റ്ററിലെ സിനഗോഗില്‍ ഭീകരാക്രമണത്തില്‍ മൂന്ന് പേര്‍ കൊല്ലപ്പെട്ട സംഭവത്തിലെ പ്രതി സിറിയന്‍ വംശജനായ ബ്രിട്ടീഷ് പൗരനെന്ന് ഗ്രേറ്റര്‍ മാഞ്ചസ്റ്റര്‍ പോലീസ്. മുപ്പത്തഞ്ചുകാരനായ ജിഹാദ് അല്‍ ഷാമിയാണ് ആക്രമണം നടത്തിയതെന്ന് പോലീസ് അറിയിച്ചു. അക്രമിയെ പോലീസ് വെടിവെച്ചുകൊന്നിരുന്നു. കൊല്ലപ്പട്ട മൂന്ന് പേരില്‍ 53-കാരനായ ഏഡ്രിയന്‍ ഡോള്‍ബി, 66-കാരനായ മെല്‍വിന്‍ ക്രാവിറ്റ്സ് എന്നിവരെ തിരിച്ചറിഞ്ഞു. ഡോള്‍ബിയും ക്രാവിറ്റ്സും ക്രംപ്‌സലിലെ ജൂത കൂട്ടായ്മയിലെ അംഗങ്ങളായിരുന്നുവെന്നും പൊലീസ് അറിയിച്ചു.
ജൂതരുടെ പുണ്യദിനമായ യോം കിപ്പൂര്‍ ആയിരുന്നു വ്യാഴാഴ്ച. ആക്രമണം നടന്ന സമയത്ത് ഹീറ്റണ്‍ പാര്‍ക്ക് ഹീബ്രു സഭയുടെ സിനഗോഗില്‍ ആരാധനയ്ക്കായി ധാരാളം ആളുകളെത്തിയിരുന്നു. ദേവാലയത്തിനു പുറത്ത് ആളുകള്‍ക്കിടയിലേക്ക് കാര്‍ ഓടിച്ചുകയറ്റിയ അക്രമി ആളുകളെ കത്തി ഉപയോഗിച്ച് കുത്തുകയായിരുന്നു. പരിക്കേറ്റവരില്‍ മൂന്നു പേരുടെ നില ഗുരുതരമാണ്.
ഗാസയില്‍ ഇസ്രയേലും ഹമാസും തമ്മില്‍ രണ്ട് വര്‍ഷമായി നടക്കുന്ന യുദ്ധത്തെച്ചൊല്ലിയുള്ള സംഘര്‍ഷങ്ങള്‍ നിലനില്‍ക്കുന്നതിനാല്‍ ജൂത സമൂഹത്തില്‍ ആശങ്കകള്‍ വര്‍ധിച്ചുവരുന്ന സമയത്താണ് മാഞ്ചെസ്റ്ററിലെ ആക്രമണം. സംഭവം ഭയപ്പെടുത്തുന്നതാണെന്നും പുണ്യദിനത്തില്‍ ആക്രമണം നടന്നുവെന്നത് കൂടുതല്‍ ഭയപ്പെടുത്തുന്നുവെന്നും യുകെ പ്രധാനമന്ത്രി കെയര്‍ സ്റ്റാര്‍മര്‍ പ്രസ്താവനയില്‍ പറഞ്ഞു.
വ്യാഴാഴ്ച രാവിലെ 9.30-ന് യഹൂദി സമൂഹത്തിന്റെ വിശുദ്ധ ദിനമായ യോം കിപ്പൂറിനാണ് ജൂതസമൂഹത്തിന് നേരെ ആക്രമണമുണ്ടായത്. സിനഗോഗിന് പുറത്ത് ജനക്കൂട്ടത്തിലേക്ക് കാറോടിച്ചുകയറ്റിയ ശേഷം പ്രതി കത്തികൊണ്ട് കുത്തി പരിക്കേല്‍പ്പിക്കുകയായിരുന്നു.
ഈ സംഭവം 'നമ്മള്‍ ഒരിക്കലും കാണാന്‍ ആഗ്രഹിക്കാത്ത ദിവസമാണ്, എങ്കിലും നമ്മുടെ ഉള്ളില്‍ അറിയാമായിരുന്നു ഇത് സംഭവിക്കുമെന്ന്,' യുകെ ചീഫ് റാബി സര്‍ എഫ്രെയിം മിര്‍വിസ് പറഞ്ഞു. ഇത് 'യഹൂദി സമൂഹത്തിന് നേരെ മാത്രമല്ല, മാനവികതയുടെ അടിസ്ഥാനങ്ങള്‍ക്ക് നേരെയും നടന്ന ആക്രമണമാണ്' എന്നും അദ്ദേഹം കൂട്ടിച്ചേര്‍ത്തു.
പ്രധാനമന്ത്രി സര്‍ കീര്‍ സ്റ്റാര്‍മര്‍ ഈ 'ഭീകരമായ' ആക്രമണത്തെ അപലപിക്കുകയും യഹൂദി ജനതയെ സംരക്ഷിക്കാനും യഹൂദി വിരുദ്ധ വിദ്വേഷത്തെ പരാജയപ്പെടുത്താനും തന്റെ അധികാരത്തിലുള്ളതെല്ലാം ചെയ്യുമെന്ന് വാഗ്ദാനം ചെയ്യുകയും ചെയ്തു.
കൊല്ലപ്പെട്ടവരുടെ കുടുംബങ്ങള്‍ക്ക് പോലീസ് എല്ലാ പിന്തുണയും വാഗ്ദാനം ചെയ്തു. ഇവര്‍ ക്രംപ്‌സാല്‍ സ്വദേശികളാണെന്ന് അധികൃതര്‍ അറിയിച്ചു. മരിച്ചവരുടെ പോസ്റ്റ്‌മോര്‍ട്ടം വെള്ളിയാഴ്ച നടക്കും. യഹൂദി സമൂഹത്തിനെതിരെ വര്‍ദ്ധിച്ചുവരുന്ന വിദ്വേഷത്തിന്റെ ഫലമായാണ് ഈ ആക്രമണം നടന്നതെന്ന് വിലയിരുത്തപ്പെടുന്നു.