പാമ്പിനെ വഴിയില്‍ കണ്ട് വെട്ടിച്ചു; സ്‌കൂള്‍ കുട്ടികളുമായി പോയ ഓട്ടോറിക്ഷ തോട്ടിലേക്ക് മറിഞ്ഞു; എട്ട് വയസുകാരിയായ വിദ്യാര്‍ത്ഥിക്ക് ദാരുണാന്ത്യം; രണ്ട് വിദ്യാര്‍ഥികള്‍ക്കും ഡ്രൈവര്‍ക്കും ഗുരുതരപരിക്ക്

പത്തനംതിട്ട: പത്തനംതിട്ട തൂമ്പാക്കുളത്ത് സ്‌കൂള്‍ കുട്ടികളുമായി പോയ ഓട്ടോറിക്ഷ മറിഞ്ഞുണ്ടായ അപകടത്തില്‍ ഒരു വിദ്യാര്‍ത്ഥി മരിച്ചു. കരുമാന്‍തോട് ശ്രീനാരായണ സ്‌കൂള്‍ വിദ്യാര്‍ത്ഥിയായ എട്ട് വയസുകാരി ആദിലക്ഷ്മിയാണ് മരിച്ചത്. പാമ്പിനെ കണ്ട് വെട്ടിച്ചതിനെ തുടര്‍ന്ന് ഓട്ടോറിക്ഷ തോട്ടിലേക്ക് മറിയുകയായിരുന്നു. അപകടത്തില്‍ ഡ്രൈവര്‍ക്ക് ഗുരുതരപരിക്കേറ്റു.

ഓട്ടോയില്‍ ആറ് കുട്ടികളും ഡ്രൈവറുമാണ് ഉണ്ടായിരുന്നത്. സ്‌കൂള്‍ വിട്ട് വീട്ടിലേക്ക് മടങ്ങുന്നതിനിടെ ഓട്ടോ തോട്ടിലേക്ക് മറിയുകയായിരുന്നു. പരിക്കേറ്റ രണ്ട് വിദ്യാര്‍ഥികളുടെ നിലഗുരുതരമാണെന്നാണ് റിപ്പോര്‍ട്ടുകള്‍. പാമ്പിനെ കണ്ട് ഓട്ടോ വെട്ടിച്ചപ്പോഴാണ് അപകടം ഉണ്ടായതെന്ന് നാട്ടുകാര്‍ പറഞ്ഞു. വലിയ താഴ്ചയിലേക്കാണ് ഓട്ടോ മറിഞ്ഞതെന്നും നാട്ടുകാര്‍ പറഞ്ഞു. കുട്ടികളെ നാട്ടുകാരാണ് ആശുപത്രിയിലെത്തിച്ചത്.