പ്രായപൂർത്തി ആയാൽ വിവാഹം കഴിക്കാമെന്ന് വാഗ്ദാനം നൽകി ലൈംഗിക അതിക്രമം; തടയാനെത്തിയ മാതാപിതാക്കളെ ഭീഷണിപ്പെടുത്തി; 19കാരൻ പിടിയിൽ

ചെങ്ങന്നൂർ: 14 വയസുകാരിയെ പ്രണയം നടിച്ച് ലൈംഗിക അതിക്രമം നടത്തിയ കേസിൽ 19കാരൻ പിടിയിൽ. ഏറം മുറിയിൽ കല്ലിടാംകുഴിയിൽ തുണ്ടിൽ അച്ചു (19) വിനെ പൊലീസ് അറസ്റ്റ് ചെയ്തത്. വെൺമണി സ്വദേശിനിയായ പെൺകുട്ടിയുമായി പ്രണയത്തിലായ പ്രതി പ്രായപൂർത്തി ആയാൽ വിവാഹം കഴിച്ചുകൊള്ളാമെന്ന് പറഞ്ഞ് 14കാരിയുടെ വിശ്വാസം നേടിയെടുക്കുകയായിരുന്നു. പിന്നാലെ വീട്ടിലെത്തിയ പ്രതി പെൺകുട്ടിയെ ഭീഷണിപ്പെടുത്തുകയും ലൈംഗിക അതിക്രമം നടത്തുകയുമായിരുന്നു.

മകളെ പീഡിപ്പിക്കുന്നത് തടയാൻ ശ്രമിച്ച പെൺകുട്ടിയുടെ മാതാപിതാക്കളെ 19കാരൻ ഭീഷണിപ്പെടുത്തുകയും ദേഹോപദ്രവം ഏൽപ്പിക്കുകയും ചെയ്തിരുന്നു. തുടർന്നാണ് പ്രതിയെ പോലീസ് അറസ്റ്റ് ചെയ്തത്. സംഭവത്തിന് ശേഷം ഒളിവിൽ പോയ പ്രതിയെ തിരുവല്ലാ ഭാഗത്ത് നിന്നാണ് കഴിഞ്ഞ ദിവസം പിടികൂടിയത്. ചെങ്ങന്നൂർ ജുഡീഷ്യൽ ഒന്നാം ക്ലാസ് മജിസ്റ്റ്രേറ്റ് കോടതി 1 മുമ്പാകെ ഹാജരാക്കിയ പ്രതിയെ കോടതി 14 ദിവസത്തേക്ക് റിമാൻഡ് ചെയ്തു.