ഇവൻ മൊബൈൽ ചാർജിങ് പോർട്ടലിൽ ഒന്ന് നോക്കിയാൽ തീർന്നു; റെയിൽവേ സ്റ്റേഷനിൽ പതിവായി എത്തി കള്ളത്തനം; ഒടുവിൽ ദൃശ്യങ്ങൾ പുറത്തുവിട്ടതും കുടുങ്ങി; കൈയ്യോടെ പൊക്കി

കൊച്ചി: റെയിൽവേ സ്റ്റേഷനുകളിൽ മൊബൈൽ ഫോണുകൾ മോഷ്ടിക്കുന്നയാൾ എറണാകുളം സൗത്ത് റെയിൽവേ സ്റ്റേഷനിൽ പിടിയിലായി. തിരുവനന്തപുരം സ്വദേശി ജോസഫ്. എ ആണ് റെയിൽവേ സംരക്ഷണ സേനയുടെ (RPSF) പിടിയിലായത്. റെയിൽവേ സ്റ്റേഷനുകളിൽ മൊബൈൽ ഫോണുകൾ ചാർജ് ചെയ്യാൻ വെക്കുമ്പോൾ യാത്രക്കാർ ജാഗ്രത പുലർത്തണമെന്ന മുന്നറിയിപ്പ് നൽകുന്നതിനിടെയാണ് ഈ അറസ്റ്റ്.

ഇന്ന് പുലർച്ചെയാണ് സംഭവം. പ്ലാറ്റ്‌ഫോമിൽ ചാർജ് ചെയ്തുകൊണ്ടിരുന്ന തിരുവനന്തപുരം സ്വദേശിയുടെ മൊബൈൽ ഫോൺ മോഷ്ടിക്കാൻ ശ്രമിക്കുന്നതിനിടെയാണ് പ്രതിയെ പോലീസ് പിടികൂടിയത്. ഫോൺ നഷ്ടപ്പെട്ട വിവരം ഉടമ റെയിൽവേ പോലീസിനെ അറിയിച്ചതിനെത്തുടർന്ന്, സിസിടിവി ദൃശ്യങ്ങളുടെ സഹായത്തോടെ നടത്തിയ തിരച്ചിലിലാണ് പ്രതിയെ പിടികൂടാനായത്.

ഇയാൾ എറണാകുളം നോർത്ത് റെയിൽവേ സ്റ്റേഷനിലും സമാനരീതിയിൽ മോഷണം നടത്തിയതായി സമ്മതിച്ചിട്ടുണ്ട്. ആർപിഎഫ് ഇൻസ്പെക്ടർ ബിനോയ് ആന്റണിയുടെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.