വീട്ടുനടയിലെത്തിയത് നൽകിയ ഫോം തിരികെ വാങ്ങാൻ; കയറിച്ചെന്നതും ചെവി പൊട്ടുന്ന രീതിയിൽ തെറിവിളി; വനിതാ ബി.എൽ.ഒ യുടെ പരാതിയിൽ യുവാവ് അറസ്റ്റിൽ

തൃശൂർ: വോട്ടർ പട്ടിക പുതുക്കുന്ന ജോലിയുടെ ഭാഗമായി വീട്ടിലെത്തിയ വനിതാ ബൂത്ത് ലെവൽ ഓഫീസർക്ക് (ബി.എൽ.ഒ) നേരെ അസഭ്യം പറഞ്ഞ യുവാവ് അറസ്റ്റിലായി. തൃശ്ശൂർ ജില്ലയിലെ ചേലക്കരയിലാണ് സംഭവം നടന്നത്.

ചേലക്കര പത്തുടി സ്വദേശിയായ മധുവിനെ (39) യാണ് ചേലക്കര പോലീസ് അറസ്റ്റ് ചെയ്തത്. തീവ്ര വോട്ടർ പട്ടിക പുതുക്കലിനായി നൽകിയ ഫോം തിരികെ വാങ്ങാനെത്തിയ ഉദ്യോഗസ്ഥയ്ക്ക് നേരെ ഇയാൾ മോശമായി സംസാരിക്കുകയായിരുന്നു.

സംഭവത്തിൽ മാനസിക വിഷമവും അപമാനവും നേരിട്ട ബി.എൽ.ഒ, വിഷയം ഇലക്ഷൻ കമ്മീഷന് മുന്നിൽ പരാതിയായി ഉന്നയിച്ചു. ഇലക്ഷൻ കമ്മീഷന്റെ നിർദ്ദേശപ്രകാരമാണ് പോലീസ് ഇയാളെ അറസ്റ്റ് ചെയ്തത്.