മോനെ..ലൈഫ് സെറ്റാണ്..!!; വിദേശത്ത് ജോലി വാങ്ങിത്തരാമെന്ന് മോഹിപ്പിക്കുന്നത് വിഷ്ണുവിന്റെ സ്ഥിരം പരിപാടി; പണം കൈയ്യിൽ കിട്ടിയതും ഒരൊറ്റ മുങ്ങൽ; ഒടുവിൽ കുടുങ്ങിയത് പോലീസ് ബുദ്ധിയിൽ

പാലക്കാട്: സിംഗപ്പൂർ, യുകെ, പോളണ്ട് എന്നിവിടങ്ങളിൽ ജോലി വാഗ്ദാനം ചെയ്ത് നിരവധി യുവാക്കളിൽ നിന്ന് 36.19 ലക്ഷം രൂപ തട്ടിയെടുത്ത കേസിൽ ഒരാൾ പാലക്കാട് അറസ്റ്റിലായി. വടക്കഞ്ചേരി അഞ്ചുമൂർത്തിമംഗലം സ്വദേശിയായ വിഷ്ണുരാജ് (29) ആണ് പിടിയിലായത്.

ലൈസൻസില്ലാത്ത കൺട്രോൾ യെസ് എൽഎൽപി എന്ന സ്ഥാപനം വഴിയാണ് 2019 മുതൽ ഇയാൾ തട്ടിപ്പ് നടത്തിവന്നത്. തൃശൂർ, കോട്ടയം, പാലക്കാട് ജില്ലകളിൽ നിന്നുള്ളവരാണ് ഇരകൾ. പണം കൈപ്പറ്റിയ ശേഷം വിസ നൽകാതിരിക്കുകയും പണം തിരികെ ചോദിക്കുമ്പോൾ ഒളിവിൽ പോകുകയും മുൻകൂർ ജാമ്യമെടുക്കുകയുമായിരുന്നു വിഷ്ണുരാജിന്റെ രീതി.

ഏറ്റവും ഒടുവിൽ പാലക്കാട് പുലാപ്പൊറ്റ സ്വദേശി സന്ദീപ് നൽകിയ പരാതിയിൽ നടത്തിയ രഹസ്യ നീക്കത്തിലാണ് ഇയാൾ അറസ്റ്റിലായത്. യുകെ വിസ വാഗ്ദാനം ചെയ്ത് സന്ദീപിൽ നിന്ന് മാത്രം 7.62 ലക്ഷം രൂപയാണ് തട്ടിയത്. വിഷ്ണുരാജിനെതിരെ വടക്കഞ്ചേരി, കസബ പോലീസ് സ്റ്റേഷനുകളിൽ അഞ്ച് കേസുകൾ നിലവിലുണ്ട്. ആലത്തൂർ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. അറസ്റ്റിനെ തുടർന്ന് കൂടുതൽ പേർ പരാതിയുമായി എത്താൻ സാധ്യതയുണ്ടെന്ന് പോലീസ് അറിയിച്ചു.