രഹസ്യ വിവരത്തിന്റെ അടിസ്ഥാനത്തിൽ പരിശോധന; മാരക ലഹരിമരുന്നായ ഹെറോയിനുമായി അസം സ്വദേശികൾ അറസ്റ്റിൽ

പറവൂർ: കുന്നുകരയിൽ നടത്തിയ പരിശോധനയിൽ 11.630 ഗ്രാം ഹെറോയിനും 20 ഗ്രാം കഞ്ചാവുമായി രണ്ട് അസം സ്വദേശികളെ എക്സൈസ് സംഘം പിടികൂടി. റഷീദുൽ ഇസ്‌ലാം (20), നസീറുദ്ദീൻ (25) എന്നിവരാണ് ലഹരിവസ്തുക്കളുമായി പിടിയിലായത്.

വിൽപന ലക്ഷ്യമിട്ടാണ് ഇവർ ലഹരിവസ്തുക്കൾ കൊണ്ടുവന്നതെന്ന് എക്സൈസ് ഉദ്യോഗസ്ഥർ അറിയിച്ചു. പിടിച്ചെടുത്തവയിൽ ഡിജിറ്റൽ ത്രാസ്, ഹെറോയിൻ കടത്താൻ ഉപയോഗിക്കുന്ന പ്ലാസ്റ്റിക് കണ്ടെയ്‌നറുകൾ, വിൽപനയിലൂടെ ലഭിച്ച പണം എന്നിവയും ഉൾപ്പെടുന്നു. അസമിൽ നിന്ന് ആലുവ, പറവൂർ മേഖലകളിൽ ലഹരിയെത്തിച്ച് വിൽപന നടത്തുന്ന സംഘത്തിലെ പ്രധാന കണ്ണികളാണ് അറസ്റ്റിലായതെന്ന് എക്സൈസ് വ്യക്തമാക്കി.

റേഞ്ച് ഇൻസ്പെക്‌ടർ ജിത്തു കിരൺ, എ.എസ്.ഐ വി.കെ. ഷിബു എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. സംഘത്തിലെ മറ്റുള്ളവരെ നിരീക്ഷിച്ച് വരികയാണെന്നും എക്സൈസ് അധികൃതർ അറിയിച്ചു. അറസ്റ്റിലായ ഇരുവരെയും റിമാൻഡ് ചെയ്തു. പ്രദേശത്തെ ലഹരിമരുന്ന് വിൽപന ശൃംഖല തകർക്കുന്നതിനുള്ള എക്സൈസ് നീക്കങ്ങളുടെ ഭാഗമായാണ് ഈ അറസ്റ്റ്.