സംശയം തോന്നി കസ്റ്റഡിയിലെടുത്തു; അന്വേഷണത്തിൽ പുറത്ത് വന്നത് യുവാക്കളുടെ ക്രിമിനൽ പശ്ചാത്തലം; തമിഴ്നാട് പൊലീസ് തിരഞ്ഞ പ്രതികൾ വർക്കലയിൽ അറസ്റ്റിൽ
വർക്കല: തമിഴ്നാട്ടിൽ വധശ്രമം, മോഷണം ഉൾപ്പെടെ നിരവധി ക്രിമിനൽ കേസുകളിൽ പ്രതികളായ രണ്ടുപേരെ വർക്കലയിൽ നിന്ന് പോലീസ് അറസ്റ്റ് ചെയ്തു. കോയമ്പത്തൂർ സ്വദേശികളായ ശരവണൻ (22), ഗോകുൽ ദിനേഷ് (24) എന്നിവരാണ് വർക്കല പോലീസിന്റെ പിടിയിലായത്. പാപനാശം വിനോദസഞ്ചാര മേഖലയിൽ സംശയാസ്പദമായ സാഹചര്യത്തിൽ കസ്റ്റഡിയിലെടുത്ത ഇവരെ ചോദ്യം ചെയ്തെങ്കിലും ആദ്യം കാര്യമായ വിവരങ്ങൾ ലഭിച്ചില്ല.
കൈവശമുണ്ടായിരുന്ന രേഖകൾ പരിശോധിച്ചപ്പോഴാണ് ഇവർ കോയമ്പത്തൂർ സ്വദേശികളാണെന്ന് പോലീസ് കണ്ടെത്തിയത്. തുടർന്ന് ഇരുവരെയും വർക്കല പോലീസ് കരുതൽ തടങ്കലിൽ വെച്ചു. കൂടുതൽ അന്വേഷണം നടത്തിയ പോലീസ്, തമിഴ്നാട് വടവള്ളി പോലീസ് സ്റ്റേഷനുമായി ബന്ധപ്പെട്ടപ്പോഴാണ് പ്രതികളുടെ ക്രിമിനൽ പശ്ചാത്തലം പുറത്തുവന്നത്.
ഇവർ വധശ്രമം, മോഷണം തുടങ്ങിയ കേസുകളിൽ പ്രതികളാണെന്ന് തമിഴ്നാട് പോലീസ് സ്ഥിരീകരിച്ചു. തുടർന്ന്, തമിഴ്നാട്ടിൽ നിന്നും പൊലീസുകാർ തിരുവനന്തപുരത്ത് വർക്കലയിലെത്തി. ഇരുവരെയും കസ്റ്റഡിയിലെടുത്ത് തമിഴ്നാട്ടിലേക്ക് കൊണ്ടുപോയി.