25,000 മുതല്‍ രണ്ടുലക്ഷം രൂപവരെ വില; നെടുമ്പാശ്ശേരിയില്‍ പക്ഷികളുമായി രണ്ട് പേര്‍ പിടിയില്‍: ഇവരുടെ കൈയില്‍ ഉണ്ടായിരുന്നത് 14 ഇനം അപൂര്‍വ ഇനം പക്ഷികള്‍
കൊച്ചി: രണ്ടുലക്ഷം രൂപവരെ വിലവരുന്ന 14 ഇനം അപൂര്‍വയിനം പക്ഷികളുമായി രണ്ടുപേര്‍ പിടിയില്‍. നെടുമ്പാശ്ശേരി വിമാനത്താവളത്തില്‍ വച്ചാണ് ഇവരെ കസ്റ്റംസ് പിടികൂടിയത്. തായ് എയര്‍വേയ്‌സില്‍ എത്തിയ തിരുവനന്തപുരം സ്വദേശികളായ ശരത്, ബിന്ദു എന്നിവരാണ് പിടിയിലായത്.
ഇരുവരേയും പ്രാഥമികമായി പരിശോധിച്ചപ്പോള്‍ സംശയം തോന്നിയതിനേത്തുടര്‍ന്ന് ബാഗേജ് പരിശോധന നടത്തുകയായിരുന്നു. തുടര്‍ന്നാണ് വേഴാമ്പലുകളുള്‍പ്പെടെയുള്ള പക്ഷികളെ കണ്ടെത്തിയത്. തായ്ലന്റില്‍നിന്നാണിവയെ കൊണ്ടുവന്നത്. 25,000 മുതല്‍ രണ്ടുലക്ഷം രൂപവരെ വിലവരുന്ന പക്ഷികള്‍ ഇവരുടെ പക്കലിലുണ്ടായിരുന്നു.
75,000 രൂപ പ്രതിഫലത്തിനാണ് തങ്ങള്‍ പക്ഷികളെ കടത്തിയതെന്നാണ് പിടിയിലായവര്‍ മൊഴി നല്‍കിയിട്ടുള്ളത്. പക്ഷികളെ ആര്‍ക്കാണ് കൈമാറാനിരുന്നതെന്നത് അടക്കമുള്ള കാര്യങ്ങള്‍ വനംവകുപ്പും കസ്റ്റംസും ചേര്‍ന്ന് പരിശോധിക്കും. പക്ഷികളെ തായ്ലന്‍ഡിലേക്കുതന്നെ തിരിച്ചയക്കാനുള്ള നടപടികള്‍ നടന്നുവരികയാണ്.