പൂരം കാണാന്‍ പോകുന്നതിന് വഴി ചോദിച്ചു; കേള്‍വിക്കുറവുള്ള വയോധികന് മനസ്സിലായില്ല; വഴി ചോദിച്ചിട്ട് പറഞ്ഞില്ലെന്ന് പറഞ്ഞ് വയോധികന് ക്രൂരമര്‍ദ്ദനം; അരക്കെട്ടിലെ എല്ല്‌ ഒടിഞ്ഞു
ചേര്‍പ്പ്: വഴികാട്ടാന്‍ തയ്യാറായില്ലെന്ന പേരില്‍ കാര്‍ യാത്രികരായ യുവാക്കള്‍ കേള്‍വി തടസ്സമുള്ള 74 കാരനായ വയോധികനെ അതിക്രൂരമായി മര്‍ദിച്ചു. പല്ലിശ്ശേരി കണ്‌ഠേശ്വരം കുന്നത്തുകാട്ടില്‍ മണിയെയാണ് ഞായറാഴ്ച രാത്രി എട്ടരയോടെ ഉരകം സെന്ററില്‍ മര്‍ദിച്ചത്. വയോധികനെ ആക്രമിച്ച സംഭവത്തില്‍ ഞെട്ടി സ്ഥലത്തെ ആളുകള്‍. പെരുവനം പൂരത്തിനു പോകാനായി വഴി അറിയാതെ വന്ന കാറിലെ യുവാക്കളുടെ ചോദ്യം കേള്‍വി ബുദ്ധിമുട്ട് മൂലം അദ്ദേഹം മനസ്സിലാക്കാനായില്ല. ഇതില്‍ പ്രകോപിതരായ സംഘം ഇയാളെ ബസ് സ്റ്റോപ്പിനുള്ളിലേക്കു വലിച്ചിഴച്ച് നിസ്സഹായനായി മര്‍ദിച്ചെന്നാണ് നാട്ടുകാരുടെ വിവരം.
ആക്രമണത്തില്‍ അദ്ദേഹത്തിന് അരക്കെട്ടില്‍ ഗുരുതരമായി പരിക്കേറ്റു. ഇപ്പോള്‍ മുളങ്കുന്നത്തുകാവ് മെഡിക്കല്‍ കോളേജില്‍ ചികിത്സയിലാണ്. സംഭവശേഷം പ്രതികള്‍ കാറില്‍ രക്ഷപ്പെട്ടുവെങ്കിലും, മൊബൈല്‍ ഫോണ്‍ സ്ഥലത്ത് വിട്ടുപോയ ഒരാള്‍ പിന്നീട് തിരിച്ചെത്തിയപ്പോള്‍ നാട്ടുകാരെ വീണ്ടും ഭീഷണിപ്പെടുത്തിയതായും അറിയപ്പെടുന്നു. നാട്ടുകാര്‍ കാറിന്റെ ചിത്രം പകര്‍ത്തി പൊലീസിന് കൈമാറിയിട്ടുണ്ട്. പരാതിയൊന്നും ഇതുവരെ ലഭിച്ചിട്ടില്ലെന്നും, ലഭിക്കുന്നസമയത്ത് കൃത്യമായ അന്വേഷണം നടത്തുമെന്നും ചേര്‍പ്പ് ഇന്‍സ്‌പെക്ടര്‍ വ്യക്തമാക്കി. ഈ മര്‍ദ്ദനം പൂര്‍ണ്ണമായും അപലപനീയമാണെന്ന് പഞ്ചായത്ത് വൈസ് പ്രസിഡന്റ് വി.എന്‍. സുരേഷും കോണ്‍ഗ്രസ് നേതാവ് ജോണ്‍ ആന്റണിയും പ്രതികരിച്ചു.