പാടശേഖരത്തിൽ സ്ഥാപിച്ച വൈദ്യുതിക്കെണിയിൽ ഷോക്കേറ്റ് വയോധികന്റെ മരണം; പോലീസ് അന്വേഷണത്തിൽ പ്രദേശവാസി പിടിയിൽ; സംഭവം പാലക്കാട്

പാലക്കാട്: ഒറ്റപ്പാലത്ത് അനധികൃതമായി സ്ഥാപിച്ച വൈദ്യുതി വേലിയിൽ നിന്ന് ഷോക്കേറ്റ് വയോധികൻ മരിച്ച സംഭവത്തിൽ ഒരാളെ പോലീസ് അറസ്റ്റ് ചെയ്തു. ലക്കിടി മുളഞ്ഞൂർ സ്വദേശിയായ 70 വയസ്സുകാരൻ ബാലകൃഷ്ണനാണ് പോലീസ് പിടിയിലായത്.

കഴിഞ്ഞ ദിവസമാണ് ലക്കിടി മുളഞ്ഞൂർ കുന്നത്ത് വീട്ടിൽ രാധാകൃഷ്ണനെ ഷോക്കേറ്റ് മരിച്ച നിലയിൽ കണ്ടെത്തിയത്. തുടർന്ന് പോലീസ് നടത്തിയ അന്വേഷണത്തിലാണ് വീടിന് സമീപത്തെ പാടശേഖരത്തിൽ സ്ഥാപിച്ച വൈദ്യുതിക്കെണിയിൽ നിന്നാണ് രാധാകൃഷ്ണന് ഷോക്കേറ്റതെന്ന് വ്യക്തമായത്.

ഈ വൈദ്യുതിക്കെണി സ്ഥാപിച്ചതുമായി ബന്ധപ്പെട്ടാണ് പ്രദേശവാസിയായ ബാലകൃഷ്ണനെ പോലീസ് അറസ്റ്റ് ചെയ്തത്. സംഭവത്തിൽ കൂടുതൽ പേർക്ക് പങ്കുണ്ടെന്ന് സംശയിക്കുന്നതായും അന്വേഷണം പുരോഗമിക്കുകയാണെന്നും പോലീസ് അറിയിച്ചു.