കളമശ്ശേരിയില്‍ കിടക്ക കമ്പിനി ഗോഡൗണില്‍ വന്‍ തീപിടത്തം; ഗോഡൗണിലുണ്ടായിരുന്ന വാഹനങ്ങളും കത്തിനശിച്ചു; സമീപത്തുള്ള ഇലക്ട്രിക് ലൈന്‍ പൊട്ടി വീണു; വന്‍നഷ്ടം എന്ന് റിപ്പോര്‍ട്ട്
Update: 2025-03-08 07:10 GMT
കൊച്ചി: കളമശ്ശേരിയില്‍ ഉള്ള കിടക്ക കമ്പനിയുടെ ഗോഡൗണില്‍ വന്‍ തീപിടിത്തം. കളമശ്ശേരി ബിവറേജസ് ഔട്ട്ലെറ്റിന്റെ പിന്‍വശത്തുള്ള കിടക്കക്കമ്പനിയുടെ ഗോഡൗണിനാണ് തീ പിടിച്ചത്. ഏലൂര്‍, തൃക്കാക്കര യൂണിറ്റുകളില്‍നിന്നു ഫയര്‍ഫോഴ്സെത്തി തീ അണയ്ക്കാനുള്ള ശ്രമങ്ങള്‍ നടന്നുകൊണ്ടിരിക്കുന്നു.
തീപിടിത്തം നടന്ന കെട്ടിടത്തിനു സമീപം ജനവാസമേഖല കൂടി ആയതിനാല്‍ തീയണയ്ക്കാനായി കൂടുതല്‍ യൂണിറ്റുകളില്‍നിന്നു ഫയര്‍ഫോഴ്സിനെ വിന്യസിക്കാനുള്ള നടപടികള്‍ ആരംഭിച്ചു. തീപിടിത്തത്തില്‍ സമീപത്തുള്ള ഇലക്ട്രിക് ലൈന്‍ പൊട്ടി നിലത്തുവീണു. ഗോഡൗണിലുണ്ടായിരുന്ന വാഹനങ്ങളും കത്തിനശിച്ചു. വന്‍നഷ്ടമാണ് കണക്കാക്കുന്നത്.