പ്രായപൂര്‍ത്തി ആകാത്ത പെണ്‍കുട്ടിയെ തട്ടിക്കൊണ്ടു പോയി പീഡിപ്പിച്ച കേസ്; പ്രതിക്ക് 30 വര്‍ഷത്തെ കഠിന തടവും 1,30,000 രൂപ പിഴയും
പീഡനക്കേസില്‍ പ്രതിക്ക് 30 വര്‍ഷത്തെ കഠിന തടവ്
കൊച്ചി: പ്രായപൂര്‍ത്തി ആകാത്ത പെണ്‍കുട്ടിയെ തട്ടിക്കൊണ്ടു പോയി പീഡിപ്പിച്ച കേസില്‍ പ്രതിക്ക് 30 വര്‍ഷത്തെ കഠിന തടവും, 1,30,000 രൂപ പിഴയും. എറണാകുളം ജില്ലയില്‍ പള്ളുരുത്തി രാമേശ്വരം വില്ലേജില്‍ പെരുമ്പടപ്പ് കരയില്‍ കോണം വഴിയില്‍ കിഴക്കേ കട്ടത്തറ കൃഷ്ണന്‍ റോഡ് ഭാഗത്ത് നെറ്റോ വീട്ടില്‍ ഫെനിക്‌സ് ( 40) നെയാണ് കട്ടപ്പന പോക്‌സോ കോടതി ജഡ്ജ് മഞ്ജു വി ശിക്ഷിച്ചത്.
പോക്‌സോ വകുപ്പ് പ്രകാരം 20 വര്‍ഷത്തെ കഠിന തടവിനും ഒരു ലക്ഷം രൂപ പിഴയും ഐപിസി വകുപ്പ് പ്രകാരം 10 വര്‍ഷത്തെ കഠിന തടവും 30000/ രൂപ പിഴയുമാണ് ശിക്ഷിച്ചത്. പിഴ ഒടുക്കിയില്ലെങ്കില്‍ രണ്ടര വര്‍ഷത്തെ കഠിന തടവും അനുഭവിക്കണം.
2014 ല്‍ കട്ടപ്പന പോലീസ് സ്റ്റേഷനില്‍ രജിസ്റ്റര്‍ ചെയ്ത കേസിലാണ് ശിക്ഷ. വിചാരണ വേളയില്‍ പ്രതി ഒളിവില്‍ പോകുകയും പിന്നീട് മറ്റൊരു കേസില്‍ അറസ്റ്റില്‍ ആകുകയും ചെയ്തു. തുടര്‍ന്ന് വീണ്ടും വിചാരണ ആരംഭിക്കുകയായിരുന്നു. കട്ടപ്പന മുന്‍ ഇന്‍സ്പെക്ടര്‍ ആയിരുന്ന റെജി. എം. കുന്നിപ്പറമ്പന്‍ ആണ് കേസ് അനേഷിച്ചത്. പ്രോസിക്യൂഷന് വേണ്ടി അഡ്വ. സുസ്മിത ജോണ്‍ ഹാജരായി.