എഡിഎം നവീന്‍ ബാബുവിന്റെ മരണം: ജില്ലാ പഞ്ചായത്ത് പ്രസിഡന്റ് പറഞ്ഞ സംരംഭകന്റെ പരാതി ലഭിച്ചിട്ടില്ലെന്ന് കണ്ണൂര്‍ കലക്ടര്‍
ജില്ലാ പഞ്ചായത്ത് പ്രസിഡന്റ് പറഞ്ഞ സംരംഭകന്റെ പരാതി ലഭിച്ചിട്ടില്ലെന്ന് കണ്ണൂര്‍ കലക്ടര്‍
കണ്ണൂര്‍: കണ്ണൂര്‍ എഡിഎം കെ നവീന്‍ ബാബുവിന്റെ മരണം സംബന്ധിച്ച് ജില്ലാ കലക്ടര്‍ അരുണ്‍ കെ വിജയന്‍ റവന്യു വകുപ്പ് മന്ത്രിക്ക് പ്രാഥമിക റിപ്പോര്‍ട്ട് സമര്‍പ്പിച്ചു. ജില്ലാ പഞ്ചായത്ത് പ്രസിഡന്റ് ഉന്നയിച്ച വിഷയം സംബന്ധിച്ച് പരാതിക്കാരന്റെ ഭാഗത്തുനിന്ന് രേഖാമൂലമുള്ള പരാതിയൊന്നും തനിക്ക് ലഭിച്ചിട്ടില്ലെന്ന് കലക്ടര്‍ റിപ്പോര്‍ട്ടില്‍ അറിയിച്ചു. കൂടുതല്‍ അന്വേഷണം നടത്തിയ ശേഷം വിശദമായ റിപ്പോര്‍ട്ട് കലക്ടര്‍ മന്ത്രിക്ക് സമര്‍പ്പിക്കും.
കെ നവീന്‍ ബാബുവിന്റെ മൃതദേഹം പരിയാരം മെഡിക്കല്‍ കോളജില്‍ പോസ്റ്റ് മോര്‍ട്ടം നടത്തി. മൃതദേഹം ബന്ധുക്കള്‍ക്ക് കൈമാറും.
എഡിഎമ്മിന്റെ ക്വാര്‍ട്ടേഴ്സില്‍ കണ്ണൂര്‍ തഹസില്‍ദാര്‍ ഇന്‍ ചാര്‍ജ് സി കെ ഷാജിയാണ് മൃതദേഹം ഇന്‍ക്വസ്റ്റ് നടത്തിയത്. മൃതദേഹത്തെ കണ്ണൂര്‍ റവന്യു വകുപ്പില്‍നിന്നുള്ള ഉദ്യോഗസ്ഥ സംഘം പത്തനംതിട്ടയിലേക്ക് അനുഗമിക്കുമെന്ന് കലക്ടര്‍ അറിയിച്ചു.