നിയമസഭാ സമ്മേളനം ഇടവേളക്ക് ശേഷം നാളെ പുനരാരംഭിക്കും; സഭാ നടപടികള്‍ ഒക്ടോബര്‍ പത്ത് വരെ തുടരും
നിയമസഭാ സമ്മേളനം ഇടവേളക്ക് ശേഷം നാളെ പുനരാരംഭിക്കും; സഭാ നടപടികള്‍ ഒക്ടോബര്‍ പത്ത് വരെ തുടരും
തിരുവനന്തപുരം: പതിനഞ്ചാം കേരള നിയമസഭയുടെ പതിനാലാം സമ്മേളനം ഇടവേളയ്ക്ക് ശേഷം നാളെ പുനരാരംഭിക്കും. സഭാ നടപടികള്‍ ഒക്ടോബര്‍ 10 വരെ തുടരും. സുപ്രധാനമായ സാമ്പത്തിക വിഷയങ്ങളാണ് സഭ നാളെ ചര്‍ച്ച ചെയ്യുക. 2025-26 സാമ്പത്തിക വര്‍ഷത്തേക്കുള്ള ബജറ്റില്‍ അധികമായി പണം ആവശ്യപ്പെടുന്ന ഉപധനാഭ്യര്‍ത്ഥനകള്‍ സംബന്ധിച്ച ചര്‍ച്ചയും വോട്ടെടുപ്പും ഈ ദിവസം നടക്കും.
2025-ലെ കേരള സ്വകാര്യ കൈവശത്തിലുള്ള അധികഭൂമി (ക്രമവത്കരണ) ബില്‍, 2025-ലെ കേരള ഡിജിറ്റല്‍ ശാസ്ത്ര സാങ്കേതിക നൂതനവിദ്യ സര്‍വ്വകലാശാല (ഭേദഗതി) ബില്‍, 2025-ലെ മലയാളഭാഷാ ബില്‍, 2025-ലെ കേരള പൊതു സേവനാവകാശ ബില്‍. എന്നീ ബില്ലുകളും നാളെ അവതരിപ്പിക്കും, ഒക്ടോബര്‍ 7ന് ധനവിനിയോഗ ബില്‍ പരിഗണിക്കും.
സാമ്പത്തിക നടപടികളുടെ തുടര്‍ച്ചയായി ഒക്ടോബര്‍ 7, ചൊവ്വാഴ്ച, ഉപധനാഭ്യര്‍ത്ഥനകള്‍ ഉള്‍ക്കൊള്ളിച്ചുകൊണ്ടുള്ള ധനവിനിയോഗ ബില്‍ സഭ പരിഗണിക്കും. ഒക്ടോബര്‍ 8, ബുധന്‍, ഒക്ടോബര്‍ 9, വ്യാഴം എന്നീ ദിവസങ്ങള്‍ പ്രധാനമായും സര്‍ക്കാര്‍ കാര്യങ്ങള്‍ക്കും, മുമ്പ് അവതരിപ്പിക്കപ്പെട്ടതും കമ്മിറ്റികളുടെ പരിഗണനയിലുള്ളതുമായ ബില്ലുകള്‍ ചര്‍ച്ച ചെയ്ത് പാസ്സാക്കുന്നതിനും വേണ്ടി വിനിയോഗിക്കും. ഈ ദിവസങ്ങളില്‍ സുപ്രധാന നിയമനിര്‍മ്മാണങ്ങള്‍ സഭയില്‍ പൂര്‍ത്തിയാക്കും.
സമ്മേളനം പിരിയുന്ന അവസാന ദിവസമായ ഒക്ടോബര്‍ 10, വെള്ളിയാഴ്ച അനൗദ്യോഗികാംഗങ്ങളുടെ കാര്യം ഒഴിവാക്കി പകരം ഗവണ്‍മെന്റ് കാര്യങ്ങള്‍ക്കായി പൂര്‍ണ്ണമായി വിനിയോഗിക്കാന്‍ സമിതി ശുപാര്‍ശ ചെയ്തു.