ആറ് ലക്ഷം രക്ഷിതാക്കൾക്ക് ഇത് ഗുണകരമാകും; സംസ്ഥാനത്തെ പൊതുവിദ്യാലയങ്ങളിൽ 'സർവം എഐ മയം' പദ്ധതിക്ക് തുടക്കമായി; നിർമിത ബുദ്ധിയിൽ പരിശീലനം

തിരുവനന്തപുരം: സംസ്ഥാനത്തെ പൊതുവിദ്യാലയങ്ങളിൽ 'സർവം എഐ മയം' പദ്ധതിക്ക് തുടക്കമായി. ലിറ്റിൽ കൈറ്റ്സ് ഐടി ക്ലബ്ബുകളിലെ കുട്ടികളുടെ നേതൃത്വത്തിൽ ആറ് ലക്ഷം രക്ഷിതാക്കൾക്ക് ആർട്ടിഫിഷ്യൽ ഇന്റലിജൻസ് (എഐ), സൈബർ സുരക്ഷ എന്നിവയിൽ പരിശീലനം നൽകുന്നതാണ് ഈ പദ്ധതി. ജൂൺ 30 വരെ നടക്കുന്ന ഈ പരിശീലനം രാജ്യത്തെ മുതിർന്നവർക്കായുള്ള ഏറ്റവും വലിയ എഐ സാക്ഷരതാ യജ്ഞമായി മാറുമെന്ന് അധികൃതർ അറിയിച്ചു.

രണ്ട് മണിക്കൂർ ദൈർഘ്യമുള്ള മോഡ്യൂളിലൂടെയാണ് രക്ഷിതാക്കൾക്ക് പരിശീലനം നൽകുന്നത്. എഐയുടെ ഗുണങ്ങൾക്കും ദോഷങ്ങൾക്കും തുല്യ പ്രാധാന്യം നൽകിക്കൊണ്ടാണ് പഠനം ക്രമീകരിച്ചിരിക്കുന്നത്. മനുഷ്യ ബുദ്ധിക്ക് സമാനമായി ചിന്തിക്കാനും തീരുമാനങ്ങളെടുക്കാനും യന്ത്രങ്ങളെ പ്രാപ്തമാക്കുന്ന മെഷീൻ ലേണിംഗ് സാങ്കേതികവിദ്യയെക്കുറിച്ച് ലളിതമായ വിശദീകരണത്തോടെയാണ് ക്ലാസുകൾ ആരംഭിക്കുന്നത്.

സ്മാർട്ട് ഫോണുകളിലെ എഐ സേവനങ്ങൾ ഉപയോഗിച്ച് പക്ഷികളെയും ചെടികളെയും തിരിച്ചറിയുന്നതിനും, തമിഴ് ഉൾപ്പെടെയുള്ള അന്യഭാഷാ ബോർഡുകൾ തത്സമയം മലയാളത്തിലേക്ക് വിവർത്തനം ചെയ്യുന്നതിനും രക്ഷിതാക്കളെ പരിശീലിപ്പിക്കും. എഐ ടൂളുകളുടെ സഹായത്തോടെ ചെയ്യാവുന്ന പ്രവൃത്തികളും പരിശീലനത്തിൽ പരിചയപ്പെടുത്തും. എഐ ഉപയോഗിച്ച് നിർമിക്കുന്ന ഡീപ്പ് ഫേക്ക് വീഡിയോകൾ, വ്യാജ ചിത്രങ്ങൾ, ശബ്ദങ്ങൾ എന്നിവ തിരിച്ചറിയാനുള്ള മാർഗങ്ങൾക്കും പ്രത്യേക ഊന്നൽ നൽകുന്നുണ്ട്.

സോഷ്യൽ മീഡിയയിലെ വ്യാജവാർത്താ പ്രചരണങ്ങളെ എങ്ങനെ പ്രതിരോധിക്കാമെന്നും, ഇന്റർനെറ്റ് മര്യാദകൾ പാലിക്കേണ്ടതിന്റെ പ്രാധാന്യത്തെക്കുറിച്ചും രക്ഷിതാക്കൾക്ക് അവബോധം നൽകും. കൈറ്റ് വികസിപ്പിച്ച സമഗ്ര പ്ലസ് ലേണിംഗ് റൂം പോലുള്ള എഐ അധിഷ്ഠിത വിദ്യാഭ്യാസ പ്ലാറ്റ്ഫോമുകളും പരിശീലനത്തിന്റെ ഭാഗമായി പരിചയപ്പെടുത്തും.

കൈറ്റ് സിഇഒ കെ. അൻവർ സാദത്ത് അറിയിച്ചതനുസരിച്ച്, 2023-24 കാലയളവിൽ നാല് ലക്ഷം രക്ഷിതാക്കൾക്ക് സൈബർ സുരക്ഷാ പരിശീലനം നൽകിയതിന്റെ വിജയകരമായ തുടർച്ചയായാണ് ഈ പുതിയ പദ്ധതി ആവിഷ്കരിച്ചിരിക്കുന്നത്. ഫെബ്രുവരി 20 മുതൽ നിലവിൽ വന്ന ഏറ്റവും പുതിയ ഐടി ഭേദഗതി നിയമങ്ങൾ ഉൾപ്പെടെയുള്ള സുരക്ഷാ മാനദണ്ഡങ്ങളും ഈ പരിശീലനത്തിലൂടെ രക്ഷിതാക്കളിലേക്ക് എത്തുമെന്നും അദ്ദേഹം വ്യക്തമാക്കി. സാങ്കേതികവിദ്യയുടെ വളർച്ചയ്ക്കനുസരിച്ച് സമൂഹത്തെ സജ്ജമാക്കുക എന്ന ലക്ഷ്യത്തോടെ ആരംഭിച്ച ഈ പദ്ധതി, സാധാരണ ജനങ്ങൾക്കിടയിൽ എഐ സാക്ഷരത വർദ്ധിപ്പിക്കുന്നതിൽ നിർണ്ണായക പങ്കുവഹിക്കുമെന്നാണ് പ്രതീക്ഷിക്കുന്നത്.