കനത്ത മഴയില്‍ നിറഞ്ഞൊഴുകിയ ഓവുചാലില്‍ വണ്ട് 60കാരനെ കാണാതായ സംഭവം; ആള്‍ക്കായി ഇന്നും തിരച്ചില്‍ തുടരും; അബദ്ധത്തില്‍ കാല്‍ വഴുതി ഓടയില്‍ വീഴുകയായിരുന്നു; സംഭവം കോഴിക്കോട്
കോഴിക്കോട്: കോവൂരില്‍ ശക്തമായ മഴയെ തുടര്‍ന്ന് കവിഞ്ഞൊഴുകിയ ഓടയില്‍ വീണ് കാണാതായ ആള്‍ക്കുവേണ്ടിയുള്ള തിരച്ചില്‍ ഇന്നും തുടരും. ഇന്ന് രാവിലെ മുതല്‍ തിരച്ചില്‍ വീണ്ടും പുനരാരംഭിക്കും. ഇന്നലെ രാത്രി എട്ടരയോടെയാണ് കോവൂര്‍ സ്വദേശി കളത്തിന്‍പൊയില്‍ ശശി ഓടയില്‍ വീണത്. കോവൂര്‍ എംഎല്‍എ റോഡില്‍ ബസ് സ്റ്റോപ്പില്‍ ഇരിക്കുകയായിരുന്നു ശശി. അബദ്ധത്തില്‍ കാല്‍ വഴുതി ഓവുചാലില്‍ വീഴുകയായിരുന്നു. വീടിന് തൊട്ടടുത്ത് വെച്ചാണ് അപകടം സംഭവിച്ചത്.
വീണയുടനെ സമീപത്തുണ്ടായിരുന്ന ആളുകള്‍ തിരച്ചില്‍നടത്തിയെങ്കിലും ആളെ കണ്ടെത്താനായില്ല. തുടര്‍ന്ന് നാട്ടുകാര്‍ അഗ്‌നിരക്ഷാസേനയെ വിവരമറിയിക്കുകയായിരുന്നു. നാട്ടുകാരും അഗ്‌നിരക്ഷാസേനയും സന്നദ്ധപ്രവര്‍ത്തരും രണ്ടുകിലോമീറ്ററോളം ദൂരത്തില്‍ രാത്രിവൈകിയും പരിശോധന നടത്തിയെങ്കിലും കണ്ടെത്താനായില്ല. കോവൂര്‍, ചേവായൂര്‍, ചേവരമ്പലം, മെഡിക്കല്‍ കോളേജ് പ്രദേശങ്ങളിലെ വെള്ളം ഈ ഓവുചാലിലൂടെ മാമ്പുഴയിലാണ് എത്തുന്നത്. രാത്രിയിലും തിരച്ചില്‍ നടത്തിയിരുന്നു.