പോലീസിനെ കണ്ടത്തോടെ പരുങ്ങൽ; സംശയം തോന്നി പരിശോധന നടത്തിയപ്പോൾ കിട്ടിയത് മെത്താഫിറ്റമിൻ; യുവാവ് പിടിയിൽ
കല്‍പ്പറ്റ: വെങ്ങപ്പള്ളിയിൽ മാരക മയക്കുമരുന്നായ മെത്താഫിറ്റമിനുമായി യുവാവ് പിടിയിൽ. കല്‍പ്പറ്റ മുണ്ടേരി താന്നിക്കല്‍ വീട്ടില്‍ ടി.കെ വേണുഗോപാല്‍ (32) നെ യാണ് കല്‍പ്പറ്റ പോലീസും ജില്ല ലഹരിവിരുദ്ധ സ്‌ക്വാഡും ചേര്‍ന്ന് പിടികൂടിയത്. പാന്റ്‌സിന്റെ പോക്കറ്റില്‍ നിന്നുമാണ് 9.25 ഗ്രാം മെത്തഫിറ്റമിന്‍ കണ്ടെടുത്തത്. നിരവധി ലഹരിക്കടത്ത് കേസുകളില്‍ പ്രതിയാണ് വേണുഗോപാലെന്ന് പോലീസ് പറഞ്ഞു.
ഇന്നലെ വൈകുന്നേരത്തോടെ കല്‍പ്പറ്റക്കടുത്ത വെങ്ങപ്പള്ളി പഞ്ചാബ് മുസ്ലിം പള്ളിക്ക് സമീപത്ത് വെച്ചാണ് പ്രതിയെ പോലീസ് പിടികൂടിയത്. പോലീസിനെ കണ്ടപ്പോള്‍ പരുങ്ങിയ യുവാവിനെ ചോദ്യം ചെയ്തപ്പോള്‍ സംശയം തോന്നിയതിനെ തുടർന്ന് പരിശോധന നടത്തുകയായിരുന്നു.
കല്‍പ്പറ്റ, മാനന്തവാടി പോലീസ് സ്‌റ്റേഷനുകളിലും കല്‍പ്പറ്റ എക്‌സൈസ് ഓഫീസിലും പ്രതിക്കെതിരെ കേസുകളുണ്ട്. കോടതയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. കല്‍പ്പറ്റ സബ് ഇന്‍സ്പെക്ടര്‍ വിമല്‍ ചന്ദ്രന്റെ നേതൃത്വത്തിലുള്ള സംഘമാണ് പരിശോധന നടത്തിയത്.