മദ്യപിച്ചെത്തി ബഹളം വച്ചതിനെ ചോദ്യം ചെയ്തു; മധ്യവയസ്കനെ അയൽവാസി കഴുത്തറുത്തു കൊന്നു; പ്രതി പിടിയിൽ

തിരുവനന്തപുരം: മദ്യപിച്ചെത്തി ബഹളം വച്ചതിനെ ചോദ്യം ചെയ്ത മധ്യവയസ്കനെ അയൽവാസി കഴുത്തറുത്ത് കൊന്നു. കിളിമാനൂർ കാരേറ്റിലാണ് അരും കൊല. സംഭവത്തിൽ സുനിൽ കുമാർ എന്നയാളെ കിളിമാനൂർ പോലീസ് അറസ്റ്റ് ചെയ്തു. ഇന്നലെ രാത്രിയാണ് സുനിൽ കുമാർ അയൽ വാസിയായ ബാബു രാജിനെ കഴുത്തറുത്ത് കൊന്നത്.

ഇന്നലെ രാത്രി ഏഴരയോടെയായിരുന്നു സംഭവമുണ്ടായത്. പ്രതിയായ സുനിൽ കുമാർ മദ്യപിച്ചെത്തി പ്രശ്നങ്ങൾ ഉണ്ടാക്കുന്നത് പതിവായിരുന്നു. റോഡിലൂടെ പോകുന്നവരെ മർദ്ദിക്കുന്ന സംഭവങ്ങളും മുമ്പ് ഉണ്ടായിട്ടുള്ളതായി നാട്ടുകാർ പറയുന്നു. സംഭവ ദിവസവും ഇയാൾ മദ്യപിച്ചെത്തി ബഹളം വച്ചിരുന്നു. ഇതിനിനെ ചോദ്യം ചെയ്തതിനെ തുടർന്നാണ് കാരേറ്റ് പേടികുളം സ്വദേശി ബാബുരാജിനെ അയൽ വാസിയായ സുനിൽ കുമാർ കഴുത്തറുത്ത് കൊന്നത്.

സുനിൽ കുമാർ കത്തികൊണ്ട് ബാബുരാജിൻ്റെ കഴുത്തിൽ ആഴത്തിൽ മുറിവേൽപ്പിക്കുകയായിരുന്നു. കഴുത്തറത്ത ശേഷവും ഇയാൾ കത്തിയുമായി സ്ഥലത്ത് തുടർന്നതോടെ ബാബുരാജിൻ്റെ സമീപത്തേക്ക് പോകാനോ ആശുപത്രിയിലേക്ക് മാറ്റാനോ നാട്ടുകാർക്ക് ആയില്ല. തുടർന്ന് നാട്ടുകാർ പോലീസിൽ വിവരം അറിയിക്കുകയായിരുന്നു. ഒടുവിൽ പോലീസെത്തി സുനിൽ കുമാറിനെ അറസ്റ്റ് ചെയ്ത് മാറ്റിയതോടെയാണ്, ബാബുരാജിനെ മെഡിക്കൽ കോളേജ് ആശുപത്രിയിൽ എത്തിക്കാൻ സാധിച്ചത്.

ആശുപത്രിയിൽ എത്തിച്ചെങ്കിലും ബാബുരാജിന്റെ ജീവൻ രക്ഷിക്കാനായില്ല. കഴുത്തിൻ്റെ വലതു ഭാഗത്തേറ്റ ആഴത്തിലുള്ള മുറിവാണ് മരണ കാരണം. മരിച്ച ബാബു രാജ് ചുടുകട്ട കമ്പനിയിലെ ജീവനക്കാരനാണ്. ഇയാൾ വീട്ടിൽ ഒറ്റയ്ക്കായിരുന്നു താമസം. സുനിൽ കുമാറിൻ്റെ അറസ്റ്റ് കിളിമാനൂർ പോലീസ് രേഖപ്പെടുത്തി. പ്രതിയെ കോടതിയിൽ ഹാജരാക്കും.