ഉന്നത മനോഭാവമുള്ളവരാണ് ഇത്രയും നാള്‍ ഭരിച്ചത്; എന്നിട്ട് ആദിവാസികള്‍ക്ക് എന്ത് ഗുണമുണ്ടായെന്ന് സി കെ ജാനു
സുരേഷ് ഗോപിയുടെ പരാമര്‍ശത്തെ വിമര്‍ശിച്ച് സി കെ ജാനു
വയനാട്: ഉന്നതകുല ജാതര്‍ ആദിവാസി വകുപ്പ് കൈകാര്യം ചെയ്യട്ടെയെന്ന കേന്ദ്രമന്ത്രി സുരേഷ്‌ഗോപിയുടെ പ്രസ്താവനയെ വിമര്‍ശിച്ച് ആദിവാസി ഗോത്ര മഹാസഭ നേതാവും ജനാധിപത്യ രാഷ്ട്രീയ പാര്‍ട്ടി സംസ്ഥാന പ്രസിഡന്റുമായ സി കെ ജാനു രംഗത്ത്.
''സുരേഷ്‌ഗോപിയുടേത് തരം താണ സമീപനമാണ്. ഉന്നത മനോഭാവമുള്ളവരാണ് ഇത്രയും നാള്‍ ആദിവാസി വകുപ്പ് ഭരിച്ചത്. ഇതിലും ഉന്നതര്‍ ഇനി ഏതാണെന്ന് അറിയില്ല. ആദിവാസികള്‍ ആയിട്ടുള്ള ആരും ഇക്കാലമത്രയും ഇത്തരം വകുപ്പുകളില്‍ ഇടപെട്ടിട്ടില്ല... അങ്ങിനെയൊരു ചരിത്രമേ ഉണ്ടായിട്ടില്ല. അവര്‍ തന്നെയാണ് ഈ വകുപ്പുകളുടെ ഉന്നത ശ്രേണിയിലേക്ക് വരേണ്ടത്. അങ്ങനെയെങ്കില്‍ മാത്രമേ ആദിവാസികള്‍ക്ക് പ്രയോജനകരമാകൂ. ഒരു തരത്തിലും കേന്ദ്രമന്ത്രിയുടെ ഈ പ്രതികരണം അംഗീകരിക്കാന്‍ കഴിയില്ലെന്നും ഇത്രകാലം ഈ വകുപ്പുകള്‍ ഇവര്‍ കൈകാര്യം ചെയ്തിട്ടും ആദിവാസികളുടെ അവസ്ഥ എന്താണ്? വംശ ഹത്യയെ നേരിടുന്ന സ്ഥിതിയാണുള്ളത്. ആദിവാസികളെ പൂര്‍ണമായും ഇല്ലായ്മ ചെയ്യലാണോ ലക്ഷ്യം'' എന്നും സികെ ജാനു ചോദിച്ചു.