ലിവര്‍ എന്‍സൈമുകള്‍ സാധാരണനിലയിലേക്ക്; കണ്ണൂരില്‍ മരുന്ന് മാറി കഴിച്ച് ഗുരുതരാവസ്ഥയിലായ കുഞ്ഞ് സുഖം പ്രാപിക്കുന്നു: മെഡിക്കല്‍ ഷോപ്പിനെതിരെ കേസെടുത്ത് പോലിസ്
കണ്ണൂരില്‍ മരുന്ന് മാറി കഴിച്ച് ഗുരുതരാവസ്ഥയിലായ കുഞ്ഞ് സുഖം പ്രാപിക്കുന്നു
കണ്ണൂര്‍: മെഡിക്കല്‍ ഷോപ്പുകാര്‍ മാറിനല്‍കിയ മരുന്ന് കഴിച്ചു ഗുരുതരാവസ്ഥയിലായ,കുഞ്ഞ് ആരോഗ്യം വീണ്ടെടുത്തുതുടങ്ങി. ലിവര്‍ എന്‍സൈമുകള്‍ സാധാരണനിലയിലേക്കു വന്നെന്ന് കണ്ണൂര്‍ ആസ്റ്റര്‍ മിംസ് ആശുപത്രിയില്‍ കുട്ടിയെ ചികിത്സിക്കുന്ന ഡോ. എം.കെ.നന്ദകുമാര്‍ പറഞ്ഞു. ഡോക്ടര്‍ നിര്‍ദേശിച്ച മരുന്നിനു പകരം മെഡിക്കല്‍ ഷോപ്പുകാര്‍ മറ്റൊരു മരുന്ന് മാറി നല്‍കിയതാണ് കുഞ്ഞിന്റെ ആരോഗ്യ നില വഷളാക്കിത്.
പനിയെത്തുടര്‍ന്ന് ശനിയാഴ്ചയാണ് കുഞ്ഞിനെ പഴയങ്ങാടിയിലെ ക്ലിനിക്കില്‍ കാണിച്ചത്. ഡോക്ടര്‍ എഴുതിയ സിറപ്പിനു പകരം പഴയങ്ങാടി ടൗണിലെ ഖദീജ മെഡിക്കല്‍സില്‍നിന്നു നല്‍കിയത് അതേ ബ്രാന്‍ഡിന്റെ ഡ്രോപ്‌സാണ്. മരുന്ന് കഴിച്ചതിന് പിന്നാലെ ചെറുകുന്ന് പൂങ്കാവിലെ എട്ടുമാസം പ്രായമുള്ള ആണ്‍കുഞ്ഞിന് കടുത്ത ക്ഷീണം ആയി.
ശനിയാഴ്ച രാത്രിയും ഞായറാഴ്ച രണ്ടുനേരവും 5 മില്ലിലീറ്റര്‍ വീതമാണ് നല്‍കിയത്. മരുന്ന് വേഗം തീര്‍ന്നതോടെ സംശയം തോന്നി. ഡോക്ടറെ വീണ്ടും കാണാന്‍ ചെന്നപ്പോഴാണു മരുന്ന് മാറിയെന്നും കൂടുതല്‍ അളവില്‍ മരുന്ന് ഉള്ളില്‍ ചെന്നിട്ടുണ്ടെന്നും അറിഞ്ഞത്. അപ്പോള്‍ത്തന്നെ നടത്തിയ പരിശോധനയില്‍ ലിവര്‍ എന്‍സൈമുകള്‍ കൂടിയിട്ടുണ്ടെന്നു പറഞ്ഞു. ഉടന്‍ മിംസിലേക്കു കൊണ്ടുവന്നു. ലിവര്‍ എന്‍സൈമുകളുടെ അളവ് ക്രമാതീതമായി ഉയര്‍ന്നതിനാല്‍ കരള്‍ മാറ്റിവയ്‌ക്കേണ്ട അവസ്ഥയായിരുന്നുവെന്ന് കുഞ്ഞിന്റെ പിതാവ് ഇ.പി.സമീര്‍ പറയുന്നു. മെഡിക്കല്‍ ഷോപ്പിനെതിരെ പഴയങ്ങാടി പൊലീസ് കേസെടുത്തിട്ടുണ്ട്.