മാനന്തവാടിയില്‍ 252 ലിറ്റര്‍ വിദേശമദ്യം പിടികൂടി; രണ്ടുപേര്‍ അറസ്റ്റില്‍
മാനന്തവാടിയില്‍ 252 ലിറ്റര്‍ വിദേശമദ്യം പിടികൂടി; രണ്ടുപേര്‍ അറസ്റ്റില്‍
മാനന്തവാടി: മാനന്തവാടിയില്‍ 252 ലിറ്റര്‍ വിദേശമദ്യം പിടികൂടി. മൂന്ന് വര്‍ഷമായി മാനന്തവാടി, കല്ലോടി, പേരിയ, വാളാട്, തിരുനെല്ലി, കാട്ടിക്കുളം എന്നീ സ്ഥലങ്ങളില്‍ വ്യാപകമായി മാഹി മദ്യം വില്‍പന നടത്തിയ രണ്ടുപേരെയാണ് എക്‌സൈസ് ഉദ്യോഗസ്ഥര്‍ പിടികൂടിയത്.
കോഴിക്കോട് കസബ ഗാന്ധി റോഡ് തൊടിയില്‍ ജ്യോതിഷ് ബാബു (37), പുല്‍പ്പള്ളി പാക്കം വെളു കൊല്ലി വട്ടവയല്‍ വി.ടി.അജിത്ത് (28) എന്നിവരെയാണ് ബുധനാഴ്ച രാത്രി എക്‌സൈസ് സംഘം അറസ്റ്റ് ചെയ്തത്. ഏകദേശം രണ്ടര ലക്ഷം രൂപ വിലവരുന്ന 252 ലിറ്റര്‍ മാഹി മദ്യമാണ് ഇവരില്‍നിന്ന് പിടിച്ചെടുത്തത്.
ജ്യോതിഷിന്റെ മാനന്തവാടിയിലെ വാടക വീട്ടിലെ അടുക്കളയില്‍ സൂക്ഷിച്ച നിലയിലായിരുന്നു മദ്യമുണ്ടായിരുന്നത്. 10 വര്‍ഷം വരെ കഠിന തടവ് ശിക്ഷ ലഭിക്കാവുന്ന കുറ്റമാണിതെന്ന് എക്‌സൈസ് അറിയിച്ചു. പ്രതികള്‍ ഏറെ നാളായി ഉദ്യോഗസ്ഥരുടെ നിരീക്ഷണത്തിലായിരുന്നു. മാനന്തവാടി എക്‌സൈസ് സര്‍ക്കിള്‍ ഇന്‍സ്പെക്ടര്‍ സജിത്ത് ചന്ദ്രന്റെ നേതൃത്വത്തിലുള്ള സംഘമാണ് പരിശോധന നടത്തിയത്. പ്രതികളെ മാനന്തവാടി കോടതിയില്‍ ഹാജരാക്കി റിമാന്‍ഡ് ചെയ്തു.