വീട്ടുമുറ്റത്ത് കളിച്ചു കൊണ്ടിരിക്കെ സ്വിമ്മിങ് പൂളില്‍ വീണ് രണ്ടു വയസ്സുകാരന് ദാരുണാന്ത്യം; ജോര്‍ജ് രക്ഷിതാക്കള്‍ക്കൊപ്പം അയര്‍ലന്‍ഡില്‍ നിന്നും എത്തിയത് കഴിഞ്ഞ മാസം: നാലു ദിവസങ്ങള്‍ക്ക് മുന്‍പ് നടന്ന മാമോദിസ ചടങ്ങിന് പിന്നാലെ മരണം
വീട്ടുമുറ്റത്ത് കളിച്ചു കൊണ്ടിരിക്കെ സ്വിമ്മിങ് പൂളില്‍ വീണ് രണ്ടു വയസ്സുകാരന് ദാരുണാന്ത്യം
കൊടുമണ്‍: വീട്ടുമുറ്റത്ത് കളിച്ചു കൊണ്ടിരിക്കെ രണ്ടു വയസ്സുകാരന് സ്വിമ്മിങ് പൂളില്‍ വീണ് ദാരുണമായി മരിച്ചു. ഇടത്തിട്ട കോട്ടപ്പുറത്ത് ലിജോ ജോയിയുടെയും ലീനയുടെയും ഇളയ മകന്‍ ജോര്‍ജ് സ്‌കറിയാ ആണ് യാദൃശ്ചികമായി ഉണ്ടായ അപകടത്തില്‍ പൊലിഞ്ഞത്. ഇന്നലെ രാവിലെ 10 മണിയോടെയാണ് സംഭവം. മുറ്റത്ത് കളിച്ചു കൊണ്ടിരിക്കുമ്പോള്‍ വീടിനോട് ചേര്‍ന്ന സ്വിമ്മിങ് പൂളിലേക്ക് വീഴുകയായിരുന്നു. സംഭവം നടന്ന് ഉടന്‍ തന്നെ കുട്ടിയെ പത്തനംതിട്ടയിലെ സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.
പുതിയ വീടിന്റെ ഗൃഹപ്രവേശനച്ചടങ്ങുമായി ബന്ധപ്പെട്ട് കഴിഞ്ഞ മാസം 21ന് ആണ് ജോര്‍ജും മാതാപിതാക്കളും സഹോദരങ്ങളും അയര്‍ലന്‍ഡില്‍ നിന്ന് നാട്ടിലെത്തിയത്. ജോര്‍ജിന്റെ മാമോദീസ ഈ മാസം ആറിനായിരുന്നു. 19ന് തിരികെ അയര്‍ലന്‍ഡിലേക്ക് മടങ്ങിപ്പോകാനിരിക്കെയാണ് ദുരന്തം. സംസ്‌കാരം ഇന്ന് 2ന് വസതിയിലെ ശുശ്രൂഷയ്ക്ക് ശേഷം 3 മണിക്ക് ചന്ദനപ്പള്ളി സെന്റ് ജോര്‍ജ് ഓര്‍ത്തഡോക്‌സ് വലിയ പള്ളിയില്‍. സഹോദരങ്ങള്‍: ജോണ്‍ സ്‌കറിയ, ഡേവിഡ് സ്‌കറിയ.