വിവാഹ പിറ്റേന്ന് വിരുന്ന് സല്‍ക്കാരത്തിന് പോകവെ ഭര്‍ത്താവിനോട് കാര്‍ നിര്‍ത്താന്‍ ആവശ്യപ്പെട്ട് യുവതി; പിന്നാലെ കാമുകന്റെ വാഹനത്തില്‍ കയറി സ്ഥലം വിട്ടു
ഭർത്താവിൻ്റെ കാർ നിർത്തിച്ച് യുവതി കാമുകനൊപ്പം ഒളിച്ചോടി
മലപ്പുറം: വിവാഹ പിറ്റേന്ന് ഭര്‍ത്താവിനെ സാക്ഷിയാക്കി യുവതി കാമുകനൊപ്പം പോയി. മലപ്പുറത്ത് പരപ്പനങ്ങാടിയിലാണ് സംഭവം. വിവാഹം കഴിഞ്ഞ് തൊട്ടടുത്ത ദിവസമാണ് യുവതി ഭര്‍ത്താവിനെ ഉപേക്ഷിച്ച് കാമുകനൊപ്പം പോയത്. വിവാഹ പിറ്റേന്ന് വിരുന്ന് സല്‍ക്കാരത്തിന് പോകവെ ഭര്‍ത്താവിനോട് കാര്‍ നിര്‍ത്താന്‍ ആവശ്യപ്പെട്ട യുവതി വഴിയില്‍ കാത്തു കിടന്ന കാമുകന്റെ കാറില്‍ കയറി പോവുക ആയിരുന്നു. ഭര്‍ത്താവ് പോലിസില്‍ പരാതി നല്‍കിയെങ്കിലും യുവതി കാമുകനൊപ്പം പോകണമെന്ന് അറിയിച്ചു.
കാമുകനൊപ്പം തുടര്‍ന്ന് ജീവിക്കാനാണ് തീരുമാനമെന്ന് യുവതി വ്യക്തമാക്കിയതോടെ കോടതി ഈ നിലപാടിനൊപ്പം നില്‍ക്കുക ആയിരുന്നു. ഇക്കഴിഞ്ഞ വെള്ളിയാഴ്ചയാണ് യുവതിയുടെ വിവാഹം നടന്നത്. തൊട്ടടുത്ത ദിവസം ഭര്‍ത്താവിനൊപ്പം വിവാഹ സത്കാരത്തിനായി പോയി. ഇരുവരും മാത്രമാണ് കാറിലുണ്ടായിരുന്നത്. വഴിമധ്യേ കാര്‍ നിര്‍ത്താന്‍ യുവതി ഭര്‍ത്താവിനോട് ആവശ്യപ്പെട്ടു. ഒരു സുഹൃത്തിനെ കാണാനുണ്ടെന്നായിരുന്നു കാരണമായി പറഞ്ഞത്. കാര്‍ നിര്‍ത്തിയ ശേഷം പുറത്തിറങ്ങിയ യുവതി ഭര്‍ത്താവ് നോക്കി നില്‍ക്കെ കാമുകന്റെ വാഹനത്തില്‍ കാമുകനൊപ്പം സ്ഥലംവിടുകയായിരുന്നു.
പിന്നാലെ ഭര്‍ത്താവായ യുവാവ് പരപ്പനങ്ങാടി പൊലീസില്‍ പരാതി നല്‍കി.അന്വേഷണത്തിനൊടുവില്‍ യുവതിയെയും കാമുകനെയും പൊലീസ് കണ്ടെത്തി. താനൂരിലെ കാമുകന്റെ വീട്ടില്‍ നിന്നാണ് ഇരുവരെയും കണ്ടെത്തിയത്. പിന്നീട് യുവതിയെ പൊലീസ് കോടതിയില്‍ ഹാജരാക്കി. കോടതിയില്‍ വച്ച് യുവതി ഭര്‍ത്താവിനൊപ്പം പോകാനല്ല, കാമുകനൊപ്പം പോകാനാണ് തനിക്ക് താത്പര്യം എന്ന് അറിയിച്ചു. ഈ ആവശ്യം അംഗീകരിച്ച കോടതി യുവതിയെ കാമുകന്റെ കൂടെ പോകാന്‍ അനുവദിക്കുകയായിരുന്നു.