എം.ഡി.എം.എയുമായി ബംഗളൂരൂവില്‍ നിന്നെത്തിയ യുവാവ് കട്ടപ്പനയില്‍ അറസ്റ്റില്‍
എം.ഡി.എം.എയുമായി ബംഗളൂരൂവില്‍ നിന്നെത്തിയ യുവാവ് കട്ടപ്പനയില്‍ അറസ്റ്റില്‍
കട്ടപ്പന: എം.ഡി.എം.എയുമായി ബംഗളൂരൂവില്‍ നിന്നെത്തിയ യുവാവ് കട്ടപ്പനയില്‍ അറസ്റ്റില്‍. കോഴിക്കോട് കൊയിലാണ്ടി നാരായണഗുരു റോഡ് പയാറ്റുവളപ്പില്‍ ഷാലീന ഹൗസില്‍ ഫാരിസ് മുഹമ്മദി (31) നെയാണ് 27ഗ്രാം എം.ഡി.എം.എയുമായി കട്ടപ്പന ഡിവൈ.എസ്.പിയുടെ നേതൃത്യത്തിലുള്ള സംഘം അറസ്റ്റ് ചെയ്തത്. ഫാരിസിന്റെ ദേഹപരിശോധന നടത്തിയപ്പോഴാണ് ശരീരത്തില്‍ ഒളിപ്പിച്ചു വച്ചിരുന്ന എം.ഡി.എം.എ കണ്ടെടുത്തത്. പൊലീസിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ കട്ടപ്പന ബൈപാസ് റോഡില്‍ പരിശോധന നടത്തുന്നതിനിടെയാണ് പ്രതി പിടിയിലായത്.
ചൊവ്വഴ്ച രാവിലെ ബംഗളൂരുവില്‍ നിന്നെത്തിയ യുവാവ് എം.ഡി.എം.എ കൈമാറാന്‍ കട്ടപ്പനയില്‍ കാത്തു നില്‍ക്കുന്നതിനിടെയാണ് പൊലീസിന്റെ പിടിയിലായത്. ഇയാള്‍ക്ക് എം.ഡി.എം.എ ലഭിച്ച ഉറവിടവും ആര്‍ക്കാണ് കൈമാറാന്‍ കാത്തുനിന്നതും ഉള്‍പ്പെടെ കൂടുതല്‍ വിവരങ്ങള്‍ അറിയാന്‍ വിശദമായി ചോദ്യംചെയ്തു വരികയാണ്.
കോഴിക്കോട് സ്വദേശിയുടെ പിന്നില്‍ എം.ഡി.എം.എ കടത്തലിന്റെ അന്തര്‍ സംസ്ഥാന സംഘം പ്രവര്‍ത്തിക്കുന്നുണ്ടെന്ന സംശയത്തില്‍ പൊലീസ് വിപുലമായ അന്വേഷണം ആരംഭിച്ചിട്ടുണ്ട്. കോഴിക്കോട് പൊലീസുമായി ബന്ധപ്പെട്ട് പ്രതിയെ കുറിച്ചുള്ള കൂടുതല്‍ വിവരങ്ങള്‍ പൊലീസ് ശേഖരിച്ചു വരികയാണ്.
ജില്ലാ പൊലീസ് മേധാവി ടി.കെ. വിഷ്ണു പ്രദീപ് ഐ.പി.എസിന്റെ കിഴിലുള്ള ഡാന്‍സാഫ് ടീമും കട്ടപ്പന ഡിവൈ.എസ്.പി. വി.എ. നിഷാദ് മോന്റെ നേതൃത്വത്തില്‍ സി.ഐ ടി.സി. മുരുകന്‍, എസ്.ഐമാരായ ഷാജി എബ്രാഹം, ബെര്‍ട്ടിന്‍ ജോസ്, പി.വി. മഹേഷ്, എസ്.സി.പി.ഒ. ഷെമീര്‍, സി.പി.ഒമാരായ ബിബിന്‍ മാത്യു, ആര്‍. ഗണേഷ്, സിനോജ് ജോസഫ് എന്നിവരും ചേര്‍ന്നാണ് പ്രതിയെ പിടികൂടുന്നത്.