റോഡിനു കുറുകെ ചാടിയ പുള്ളിപ്പുലിയെ ഇടിച്ച് ബൈക്ക് മറിഞ്ഞ് യുവാവിന് പരിക്ക്; രക്ഷിച്ചത് പിന്നാലെ എത്തിയ കാര്‍ യാത്രികര്‍

പട്ടിക്കാട്: പെരിന്തല്‍മണ്ണ-നിലമ്പൂര്‍ റോഡില്‍ റോഡിനു കുറുകെ ചാടിയ പുള്ളിപ്പുലിയെ ഇടിച്ച് ബൈക്ക് മറിഞ്ഞ് യുവാവിന് പരിക്കേറ്റു. പട്ടിക്കാട് പാറക്കാതൊടി കാരാട്ട് വീട്ടില്‍ മുഹമ്മദ് ഫിയാസിനാണ് (24) പരിക്കേറ്റത്. പിന്നാലെ എത്തിയ കാര്‍ യാത്രികരാണ് യുവാവിനെ പുലിയില്‍ നിന്നും രക്ഷിച്ചത്. ഞായറാഴ്ച പുലര്‍ച്ച 2.45ന് പട്ടിക്കാട് റെയില്‍വേ ഗേറ്റിനു സമീപമാണ് സംഭവം. പൂപ്പലത്തുള്ള ഓഫിസില്‍നിന്ന് ജോലി കഴിഞ്ഞ് മടങ്ങുകയായിരുന്നു ഫിയാസ്.

പെരിന്തല്‍മണ്ണ-നിലമ്പൂര്‍ റോഡില്‍ പട്ടിക്കാട് റെയില്‍വേ ഗേറ്റിന് തൊട്ടടുത്തെത്തിയപ്പോള്‍ കുറുക്കന്‍ റോഡിന് കുറുകെ ഓടുന്നത് കണ്ട ഫിയാസ് ബൈക്കിന്റെ സ്പീഡ് കുറച്ചു. വീണ്ടും പോകാനാഞ്ഞപ്പോള്‍ കുറുക്കന്റെ പിറകെ അപ്രതീക്ഷിതമായി പൊന്തക്കാട്ടില്‍നിന്ന് ചാടിയെത്തിയ പുലിയെ ബൈക്ക് ഇടിക്കുകയായിരുന്നുവെന്ന് ഫിയാസ് പറഞ്ഞു. ഇടിയുടെ ആഘാതത്തില്‍ ബൈക്കിന് കേടുപാട് സംഭവിച്ചു.

റോഡില്‍ വീണുകിടന്ന ഫിയാസിനെ ബൈക്കിന് തൊട്ടുപിന്നാലെ വന്ന കാര്‍ യാത്രികരാണ് രക്ഷപ്പെടുത്തിയത്. മൈസൂരുവിലേക്ക് വിനോദയാത്ര പോകുകയായിരുന്ന പൊന്നാനി സ്വദേശികള്‍ കാറിന്റെ ഹോണ്‍ നിര്‍ത്താതെ മുഴക്കിയാണ് പുലിയെ തുരത്തി യുവാവിനെ രക്ഷിച്ചത്.