നിലമ്പൂരില്‍ കാട്ടാന ആക്രമണത്തില്‍ അതിഥിതൊഴിലാളി കൊല്ലപ്പെട്ടു; മരിച്ചത് ടാപ്പിങ് തൊഴിലാളിയായ ജാര്‍ഖണ്ഡ് സ്വദേശി ഷാരോണ്‍
നിലമ്പൂര്‍: നിലമ്പൂരില്‍ കാട്ടാന ആക്രമണത്തില്‍ അതിഥിതൊഴിലാളി കൊല്ലപ്പെട്ടു. ടാപ്പിങ് തൊഴിലാളിയായ ജാര്‍ഖണ്ഡ് സ്വദേശി ഷാരോണ്‍ (55) ആണ് കൊല്ലപ്പെട്ടത്. വ്യാഴം രാവിലെ ഒന്‍പതോടെ അരയാട് എസ്റ്റേറ്റില്‍ ആയിരുന്നു സംഭവം. പ്രദേശത്ത് ഇന്നലെ മുതല്‍ ആനയുണ്ടായിരുന്നുവെന്ന് നാട്ടുകാര്‍ പറഞ്ഞു. അരയാട് എസ്റ്റേറ്റിലെ ടാപ്പിംഗ് തൊഴിലാളിയാണ് ഷാരോണ്‍.
കാട്ടാന ശല്യം പതിവായ പ്രദേശമാണിത്. ടാപ്പിങ് കഴിഞ്ഞ് മറ്റ് തൊഴിലാളികള്‍ക്കൊപ്പം മടങ്ങിവരികയായിരുന്നു ഷാരോണ്‍. പിന്നാലെയെത്തിയ കാട്ടാന തൊഴിലാളികളെ ഓടിക്കുകയായിരുന്നു. ഷാരോണിനൊപ്പമുണ്ടായിരുന്നവര്‍ ചിതറിയോടി രക്ഷപെട്ടു. എന്നാല്‍ ഷാരോണിന് രക്ഷപെടാനായില്ല. റബര്‍ മരങ്ങള്‍ക്ക് പിന്നിലായി കാട്ടാന ഒളിച്ചുനില്‍ക്കുകയായിരുന്നുവെന്ന് മറ്റ് തൊഴിലാളികള്‍ പറഞ്ഞു. വനംവകുപ്പ് ഉദ്യോഗസ്ഥരും പൊലീസും സംഭവ സ്ഥലത്തെത്തി. ഇന്‍ക്വസ്റ്റിന് ശേഷം മൃതദേഹം മാറ്റും.