അവിഹിത ബന്ധം മകള്‍ കണ്ടു; വിവരം പിതാവിനെ അറിയിക്കുമെന്ന് പറഞ്ഞ പതിനൊന്നുകാരിയെ കഴുത്തറുക്ക് കൊന്നു: അമ്മയ്ക്ക് വധശിക്ഷ

പാട്‌ന: അവിഹിത ബന്ധം നേരില്‍ കണ്ട മകളെ കഴുത്തറുത്ത് കൊന്ന അമ്മയ്ക്ക് വധശിക്ഷ. ബിഹാറിലാണ് നാടിനെ നടുക്കിയ സംഭവം. 11 വയസ്സുകാരിയായ ശിവാനിയാണ് അമ്മയുടെ ക്രൂരതയ്ക്ക് ഇരയായത്. ശിവാനിയുടെ മാതാവ് പൂനം ദേവി (35) ആണ് കേസില്‍ മുഖ്യപ്രതി. അമ്മയുടെ അവിഹിത ബന്ധം അച്ചനെ അറിയിക്കുമെന്ന് പറഞ്ഞതിനാണ് കുഞ്ഞിനെ അതിക്രൂരമായി കഴുത്തറുത്ത് കൊന്നത്.

അരാരിയ ജുഡീഷ്യല്‍ ഡിവിഷനിലെ ജില്ലാ അഡീഷണല്‍ സെഷന്‍സ് ജഡ്ജി റാബി കുമാറാണ് പൂനം ദേവിക്ക് ശിക്ഷ വിധിച്ചത്. അപൂര്‍വങ്ങളില്‍ അപൂര്‍വമായ കേസ് എന്ന് നിരീക്ഷിച്ചാണ് കോടതി പൂനം ദേവിക്ക് വധശിക്ഷ വിധിച്ചത്. 2023 ജൂലൈ 11 ന് രാത്രി 11 മണിയോടെയാണ് സംഭവം. ശിവാനിക്കുള്ള ഭക്ഷണത്തില്‍ കൂടിയ അളവില്‍ വിഷാംശമുള്ള ഓര്‍ഗാനോഫോസ്ഫറസ് എന്ന കീടനാശിനി കലര്‍ത്തുകയായിരുന്നു പൂനം. ഭക്ഷണം കഴിച്ച ശിവാനി ബോധരഹിതയായപ്പോള്‍, കുട്ടിയുടെ കഴുത്ത് അറുത്തു കൊലപ്പെടുത്തി, തുടര്‍ന്ന് കാമുകന്റെ സഹായത്തോടെ മൃതദേഹം വീടിന് പിന്നിലുള്ള ചോളത്തോട്ടത്തില്‍ മറവുചെയ്യുക ആയിരുന്നു.

ശിവാനിയുടെ അമ്മ പൂനം ദേവിക്ക് അതേ ഗ്രാമത്തിലെ മറ്റൊരാളുമായി ബന്ധം ഉണ്ടായിരുന്നു. ശിവാനി ഇത് അറിഞ്ഞതോടെയാണ് കൊല ചെയ്യാന്‍ പദ്ധതി ഇടുന്നത്. യുവാവിനോടൊപ്പം പൂനം ദേവിയെ കണ്ട കുട്ടി, പഞ്ചാബില്‍ ജോലിക്ക് പോയ പിതാവ് തിരിച്ചെത്തിയാല്‍ കണ്ടതെല്ലാം പറഞ്ഞുകൊടുക്കുമെന്ന് പൂനത്തിനോട് പറഞ്ഞു. തുടര്‍ന്ന് ഭര്‍ത്താവ് തിരിച്ചെത്തിയാലുണ്ടാകുന്ന പ്രത്യാഘാതങ്ങളെ ഓര്‍ത്ത് പൂനം മകളെ വകവരുത്തുകയായിരുന്നു.

ശിവാനിയുടെ അടുത്ത ബന്ധുക്കളാരും തന്നെ സംഭവത്തില്‍ പൊലീസിനെ സമീപിച്ചിരുന്നില്ല. മറിച്ച് അയല്‍വാസിയാണ് പൊലീസിലെത്തുന്നത്. ഇയാളുടെ രേഖാമൂലമുള്ള മൊഴിയുടെ അടിസ്ഥാനത്തില്‍ സനര്‍പത്ഗഞ്ച് പൊലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിക്കുകയായിരുന്നു.