ചങ്ങരോത്ത് പഞ്ചായത്തിലെ യുഡിഎഫിന്റെ 'ശുദ്ധികലശം'; ഉണ്ണി വേങ്ങേരിയുടെ പരാതിയില് എസ് സി, എസ് റ്റി വകുപ്പ് പ്രകാരം പത്ത് പേര്ക്കെതിരെ കേസെടുത്തു
കോഴിക്കോട്: കോഴിക്കോട് ചങ്ങരോത്ത് പഞ്ചായത്തില് യുഡിഎഫ് ഭരണം പിടിച്ചെടുത്തതിന് പിന്നാലെ പഞ്ചായത്ത് ഓഫീസില് വെള്ളം തളിച്ച് ശുദ്ധികലശം നടത്തിയ സംഭവത്തില് മുന് പഞ്ചായത്ത് പ്രസിഡന്റെ നല്കിയ പരാതിയില് കേസെടുത്തു. മുന് പഞ്ചായത്ത് പ്രസിഡന്റ് ഉണ്ണി വേങ്ങേരിയുടെ പരാതിയില് 10 പേര്ക്കെതിരെയാണ് കേസെടുത്തിരിക്കുന്നത്. എസ്സി-എസ്റ്റി വകുപ്പ് പ്രകാരമാണ് കേസ്. കോഴിക്കോട് ചങ്ങരോത്ത് പഞ്ചായത്ത് ഓഫീസിനു മുന്നില് വിജയാഹ്ളാദ പ്രകടനത്തിനിടെ ലീഗ് പ്രവര്ത്തകര് വെള്ളം തളിച്ച് പ്രതീകാത്മക ശുദ്ധീകരണം നടത്തിയത് വിവാദത്തിലായിരുന്നു.
എസ് സി വിഭാഗത്തില്പ്പെട്ട തന്നെ ജാതീയമായി അധിക്ഷേപിച്ചെന്നും നിയമ നടപടി സ്വീകരിക്കുമെന്നും ആയിരുന്നു നടപടിയില് പഞ്ചായത്ത് പ്രസിഡന്റ് ഉണ്ണി വേങ്ങേരിയുടെ പ്രതികരണം. എന്നാല് അഴിമതി ഭരണം തുടച്ചുനീക്കിയതിന്റെ പ്രതീകാത്മക ആഘോഷമാണ് നടത്തിയതെന്നു വിശദീകരിച്ച ലീഗ് നേതൃത്വം ആര്ക്കെങ്കിലും മനോവിഷമം ഉണ്ടായിട്ടുണ്ടെങ്കില് ഖേദം പ്രകടിപ്പിക്കുന്നു എന്നും വ്യക്തമാക്കിയിരുന്നു.
കഴിഞ്ഞ തവണ നഷ്ടപെട്ട ചങ്ങരോത്ത് പഞ്ചായത്ത് ഭരണം യുഡിഎഫ് പിടിച്ചതിനു പിന്നാലെ നടന്ന വിജയാഹ്ലാദപ്രകടനത്തിനിടയിലാണ് മുസ്ലിം ലീഗ് പ്രവര്ത്തകര് പഞ്ചായത്ത് ഓഫീസിന് മുന്നില് വെള്ളം തളിച്ച് പ്രതീകാത്മക ശുദ്ധീകരണം നടത്തിയത്. ചാണക വെള്ളം തളിച്ച് പഞ്ചായത്ത് ശുദ്ധീകരിച്ചെന്ന അടിക്കുറിപ്പോടെ ഇത് സോഷ്യല് മീഡിയയിലും പ്രചരിപ്പിച്ചു.
എസ് സി വിഭാഗത്തില്പ്പെട്ട പഞ്ചായത്ത് പ്രസിഡന്റ് ഉണ്ണി വേങ്ങേരിയെ ജാതീയമായി അധിക്ഷേപിക്കുകയായിരുന്നു മുസ്ലിം ലീഗ് എന്ന ആരോപണവുമായി സിപിഎം രംഗത്തെത്തി. സംഭവത്തില് മനോവിഷമമുണ്ടെന്നും ദളിത് സമൂഹത്തെയാണ് ലീഗ് ആക്ഷേപിച്ചതെന്നും ഉണ്ണി വെങ്ങേരി പറഞ്ഞു. ലീഗ് പ്രവര്ത്തകരുടെ നടപടിയില് പ്രതിഷേധിച്ച് ഡിവൈഎഫ്ഐ പഞ്ചായത്ത് ഓഫീസിലേക്ക് മാര്ച്ച് നടത്തിയിരുന്നു.
പട്ടികജാതി ക്ഷേമ സമിതിയും പ്രതിഷേധം സംഘടിപ്പിച്ചു. എന്നാല് ആരെയും ജാതീയമായി അധിക്ഷേപിച്ചിട്ടില്ല എന്നായിരുന്നു ലീഗ് പ്രതികരണം. അഴിമതി നിറഞ്ഞ ഭരണസമിതിയെ പുറത്താക്കി പഞ്ചായത്ത് ശുദ്ധീകരിച്ചതിന്റെ പ്രതീകാത്മക ആഘോഷമാണ് നടത്തിയതെന്നു ലീഗ് നേതൃത്വം വിശദീകരിച്ചു. 20സീറ്റുകളുള്ള പഞ്ചായത്തില് ഇത്തവണ ഒറ്റ സീറ്റില് മാത്രമാണ് എല് ഡി എഫ് വിജയിച്ചത്.