വിട്ടുകൊടുക്കാതെ ഐഎഫ്എസ് ഉദ്യോഗസ്ഥ സുപ്രീംകോടതിയിലേക്ക്; നീലലോഹിതദാസന് നാടാര്ക്ക് എതിരെ അപ്പീല്
നീലലോഹിതദാസന് നാടാര്ക്ക് എതിരെ സുപ്രീംകോടതിയില് അപ്പീല്
തിരുവനന്തപുരം: മുന് മന്ത്രി എ. നീലലോഹിതദാസന് നാടാര്ക്കെതിരെയുള്ള ലൈംഗികാതിക്രമക്കേസില് നിയമപോരാട്ടം സുപ്രീംകോടതിയിലേക്ക്്. ഹൈക്കോടതി അദ്ദേഹത്തെ കുറ്റവിമുക്തനാക്കിയതിനെതിരെ പരാതിക്കാരിയായ മുന് ഐ.എഫ്.എസ് (IFS) ഉദ്യോഗസ്ഥയാണ് ഇപ്പോള് സുപ്രീംകോടതിയെ സമീപിച്ചിരിക്കുന്നത്. ഹൈക്കോടതി വിധിയില് ഗുരുതരമായ നിയമപിഴവുകളുണ്ടെന്നും വസ്തുതകള് ശരിയായി പരിശോധിച്ചില്ലെന്നുമാണ് പരാതിക്കാരിയുടെ വാദം.
1999-ല് നടന്നതായി പറയപ്പെടുന്ന ഒരു സംഭവത്തെ ആസ്പദമാക്കിയാണ് ഈ കേസ് നിലനില്ക്കുന്നത്. വനംവകുപ്പില് ചീഫ് കണ്സര്വേറ്റര് ആയിരുന്ന ഉദ്യോഗസ്ഥയെ ഔദ്യോഗിക ആവശ്യത്തിനായി കോഴിക്കോട് ഗസ്റ്റ് ഹൗസിലേക്ക് വിളിച്ചുവരുത്തി മന്ത്രി ലൈംഗികമായി അതിക്രമിക്കാന് ശ്രമിച്ചു എന്നതാണ് കേസ്. 1999-ല് നടന്ന സംഭവമാണെങ്കിലും, 2002 ഫെബ്രുവരിയില് ഒരു മുതിര്ന്ന ഐ.എ.എസ് (IAS) ഉദ്യോഗസ്ഥ മന്ത്രിക്കെതിരെ സമാനമായ പരാതിയുമായി രംഗത്തെത്തിയതോടെയാണ് ഐ.എഫ്.എസ് ഉദ്യോഗസ്ഥയും നിയമനടപടിയുമായി മുന്നോട്ട് വന്നത്.
നിയമനടപടികള്
വിചാരണ കോടതി: എറണാകുളം ജുഡീഷ്യല് മജിസ്ട്രേറ്റ് കോടതി ആദ്യം അദ്ദേഹത്തിന് ഒരു വര്ഷം തടവുശിക്ഷ വിധിച്ചിരുന്നു.
പിന്നീട് ഈ ശിക്ഷ മൂന്ന് മാസത്തെ തടവായി കുറച്ചു. ശിക്ഷയ്ക്കെതിരെ നീലലോഹിതദാസന് നാടാര് നല്കിയ അപ്പീലില്, ഹൈക്കോടതി അദ്ദേഹത്തെ കുറ്റവിമുക്തനാക്കി. ഈ വിധിയില് നിയമപരമായ പിഴവുകളുണ്ടെന്നാണ് പരാതിക്കാരിയുടെ വാദം
സുപ്രീംകോടതിയിലെ അപ്പീലിന് ആധാരമായ കാരണങ്ങള്
ഹൈക്കോടതി വിധിക്കെതിരെ പരാതിക്കാരി പ്രധാനമായും ഉന്നയിക്കുന്ന വാദങ്ങള് ഇവയാണ്:
തെളിവുകളുടെ അവഗണന: പ്രോസിക്യൂഷന് ഹാജരാക്കിയ സാക്ഷിമൊഴികളും തെളിവുകളും ഹൈക്കോടതി വേണ്ടത്ര പരിഗണിച്ചില്ല. കീഴ്ക്കോടതികള് ശരിവച്ച വസ്തുതകളെ തള്ളിക്കളഞ്ഞ ഹൈക്കോടതി ഉത്തരവില് വ്യക്തമായ പിഴവുകളുണ്ട്. ഉന്നത പദവിയിലിരുന്ന ഒരാള്ക്കെതിരെയുള്ള ഗൗരവകരമായ പരാതിയില് നീതി ലഭിക്കണമെന്നും വിധി പുനഃപരിശോധിക്കണമെന്നും ഹര്ജിയില് ആവശ്യപ്പെടുന്നു.