മസ്തിഷ്ക മരണം സംഭവിച്ച 47കാരന്റെ ഹൃദയം തിരുവനന്തപുരത്ത് നിന്നും എറണാകുളത്തേക്ക്; ജനറല് ആശുപത്രിയില് ഇന്ന് ആദ്യ ഹൃദയമാറ്റ ശസ്ത്രക്രിയ
മസ്തിഷ്ക മരണം സംഭവിച്ച 47കാരന്റെ ഹൃദയം തിരുവനന്തപുരത്ത് നിന്നും എറണാകുളത്തേക്ക്
By : സ്വന്തം ലേഖകൻ
Update: 2025-12-22 03:51 GMT
തിരുവനന്തപുരം: സംസ്ഥാനത്ത് വീണ്ടും ഹൃദയമാറ്റ ശസ്ത്രക്രിയ. എറണാകുളം ജനറല് ആശുപത്രിയിലാണ് ഇന്ന് ഹൃദയം മാറ്റിവയ്ക്കല് ശസ്ത്രക്രിയ നടക്കുക. തിരുവനന്തപുരം മെഡിക്കല് കോളജില് മസ്തിഷ്ക മരണം സംഭവിച്ച ഷിബുവിന്റെ ഹൃദയമാണ് ദാനം ചെയ്യുന്നത്. എറണാകുളം ജനറല് ആശുപത്രിയില് ആദ്യത്തെ ഹൃദയമാറ്റ ശസ്ത്രക്രിയയാണ് നടക്കുക.
കൊല്ലം ഇടവട്ടം ചിറക്കല് സ്വദേശി 47 വയസുള്ള ഷിബുവിന്റെ ഹൃദയമാണ് എറണാകുളം ജനറല് ആശുപത്രിയിലേക്ക് കൊണ്ടുപോവുക. എയര് ആംബുലന്സില് ഇന്ന് രാവിലെ ഹൃദയം തിരുവനന്തപുരത്ത് നിന്നും എറണാകുളത്ത് എത്തിക്കും. ഷിബുവിന്റെ രണ്ട് വൃക്കകള്, കരള്, ഹൃദയം, 2 നേത്ര പടലങ്ങള്, സ്കിന് എന്നിവ ദാനം ചെയ്യും. വാഹനാപകടത്തിലാണ് ഷിബുവിന് മസ്തിഷ്ക മരണം സംഭവിച്ചത്. നേപ്പാള് സ്വദേശിനി ദുര്ഗയ്ക്കാണ് ഹൃദയം മാറ്റിവയ്ക്കുന്നത്.