തെരഞ്ഞെടുപ്പ് കാലത്ത് അനാവശ്യ വിവാദങ്ങള് വേണ്ട; വെള്ളാപ്പള്ളിയുമായുള്ള പരസ്യപ്പോരിന് വിരാമമിട്ട് സിപിഐ
തിരുവനന്തപുരം: എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശനുമായുള്ള പരസ്യപ്പോരിന് വിരാമമിട്ട് സിപിഐ നേതൃത്വം. പരാമര്ശങ്ങളില് പരസ്യ പ്രതികരണം വേണ്ടെന്നാണ് പാര്ട്ടി തീരുമാനം. തെരഞ്ഞെടുപ്പ് കാലത്ത് അനാവശ്യ വിവാദങ്ങള് വേണ്ടെന്നും സിപിഐ സംസ്ഥാന സെക്രട്ടേറിയറ്റില് വിലയിരുത്തലുണ്ടായി.
തന്റെ വര്ഗീയ പരാമര്ശങ്ങളെ വിമര്ശിച്ചതിന് പിന്നാലെ ബിനോയ് വിശ്വത്തിനെതിരെ വെള്ളാപ്പള്ളി നടേശന് രംഗത്ത് വന്നിരുന്നു. ബിനോയ് വിശ്വം മൂന്ന് മാസം മുന്പ് തന്റെ കയ്യില് നിന്നും പണം വാങ്ങിയിട്ടുണ്ടെന്നായിരുന്നു വെള്ളാപ്പള്ളിയുടെ പ്രധാന ആരോപണം.
വെള്ളാപ്പള്ളിയില് നിന്ന് പണം വാങ്ങിയിട്ടുണ്ടെന്ന് സിപിഐ സംസ്ഥാന സെക്രട്ടറി ബിനോയ് വിശ്വം തന്നെ വെളിപ്പെടുത്തിയിരുന്നു. ആലപ്പുഴ സമ്മേളന സമയത്ത് കാണാന് പോയിട്ടുണ്ടെന്നും, വെള്ളാപ്പള്ളി മൂന്ന് ലക്ഷം രൂപ തന്നിട്ടുണ്ടെന്നുമാണ് ബിനോയ് വിശ്വത്തിന്റെ വെളിപ്പെടുത്തല്.
എന്നാല് പണം വാങ്ങിയതിന് കണക്കുണ്ടെന്നും വഴിവിട്ട സഹായം ചെയ്യില്ല എന്ന് പറഞ്ഞാണ് വാങ്ങിയതെന്നും ബിനോയ് വിശ്വം വ്യക്തമാക്കി. വാങ്ങിയത് വാങ്ങി എന്ന് തന്നെ പറയും. വെള്ളാപ്പള്ളിയുമായി തര്ക്കത്തിനില്ല. സിപിഐ നേതാക്കള് ആരും ഒറ്റയ്ക്ക് പാര്ട്ടി ഫണ്ടിലേക്ക് പണം വാങ്ങാന് പാടില്ലെന്നും ബിനോയ് വിശ്വം വ്യക്തമാക്കിയിരുന്നു.