ചികിത്സാപിഴവിന്റെ പേരില്‍ നഴ്‌സുമാരെ അറസ്റ്റ് ചെയ്യുന്ന നടപടി പാടില്ല; രോഗികളെ പരിചരിക്കുന്നതിന് രാവും പകലും പ്രവര്‍ത്തിക്കുന്ന നഴ്‌സുമാരുടെ സേവനം അംഗീകരിക്കപ്പെടണം: ഹൈക്കോടതി
കൊച്ചി: ചികിത്സാ പിഴവ് ഉണ്ടായി എന്നതിന്റെ പേരില്‍ നഴ്‌സുമാരെ അറസ്റ്റ് ചെയ്യുന്ന നടപടി പാടില്ലെന്ന് ഹൈക്കോടതി. രോഗികളെ പരിചരിക്കുന്നതിന് രാവും പകലും പ്രവര്‍ത്തിക്കുന്ന നഴ്‌സുമാരുടെ സേവനം അംഗീകരിക്കപ്പെടണമെന്നും കോടതി പറഞ്ഞു. ചികിത്സപ്പിഴവിനെക്കുറിച്ചുള്ള പരാതിയില്‍ ഡോക്ടര്‍മാരുടെപേരില്‍ കേസെടുക്കുന്നതിന് മുന്‍പ് വിദഗ്ധാഭിപ്രായം തേടണമെന്ന് സുപ്രീംകോടതി നിര്‍ദേശമുണ്ട്. സമാന പരിരക്ഷ നഴ്സുമാര്‍ക്കും ഉറപ്പാക്കണം.
ഡോക്ടര്‍മാരുടെ കാര്യത്തില്‍ 2008-ല്‍ പുറപ്പെടുവിച്ച സര്‍ക്കുലറിന് സമാനമായ സര്‍ക്കുലര്‍ പുറപ്പെടുവിക്കാനാണ് കോടതി നിര്‍ദേശിച്ചത്. മൂന്ന് മാസത്തിനുള്ളില്‍ സര്‍ക്കാര്‍ സര്‍ക്കുലര്‍ ഇറക്കണമെന്നും ജസ്റ്റിസ് പി.വി കുഞ്ഞികൃഷ്ണന്‍ ഉത്തരവിട്ടു. ചേര്‍ത്തല താലൂക്ക് ആശുപത്രിയിലെ താത്കാലിക നഴ്സായിരുന്ന യുവതിയുടെ പേരില്‍ മനഃപൂര്‍വമല്ലാത്ത നരഹത്യക്ക് പോലീസ് രജിസ്റ്റര്‍ചെയ്ത കേസ് റദ്ദാക്കിയാണ് ഉത്തരവ്. 10 വയസ്സുള്ള കുട്ടിക്ക് ചികിത്സനല്‍കുന്നതില്‍ വീഴ്ചയുണ്ടായി എന്നായിരുന്നു പരാതി.