ഓര്‍ഡര്‍ ചെയ്തത് ലാപ്‌ടോപ്; കിട്ടിയത് ടീഷര്‍ട്ട്; ഉപഭോക്താവിന് 49,000 നഷ്ടപരിഹാരം നല്‍കാന്‍ ജില്ലാ ഉപഭോക്തൃതര്‍ക്ക പരിഹാര കമ്മീഷന്റെ ഉത്തരവ്
കൊച്ചി: ഓണ്‍ലൈന്‍ വഴി ലാപ്‌ടോപ്പ് ഓര്‍ഡര്‍ ചെയ്ത ഉപഭോക്താവിന് പകരം ടീഷര്‍ട്ട് ലഭിച്ചതിനെ തുടര്‍ന്ന്, ഇ-കൊമേഴ്സ് സ്ഥാപനം ഉപഭോക്താവിന് 49,000 നഷ്ടപരിഹാരം നല്‍കാന്‍ ജില്ലാ ഉപഭോക്തൃതര്‍ക്ക പരിഹാര കമ്മീഷന്‍ ഉത്തരവിട്ടു. പെരുമ്പാവൂര്‍ സ്വദേശി നല്‍കിയ പരാതിയിലാണ് കമ്മീഷന്റെ വിധി. ഫോട്ടോ അടക്കമുള്ള തെളിവുകളുമായി സ്ഥാപനത്തിന്റെ കസ്റ്റമര്‍ കെയറിനെ ഉപഭോക്താവ് സമീപിച്ചിരുന്നെങ്കിലും, കമ്പനി തിരികെ സ്വീകരിക്കുന്നതില്‍ താത്പര്യമില്ലെന്ന നിലപാടാണ് സ്വീകരിച്ചത്. പരാതിയെ കുറിച്ചുള്ള വിശദമായ വിശദീകരണമൊന്നും കമ്പനി നല്‍കിയില്ലെന്ന് കമ്മീഷന്‍ നിരീക്ഷിച്ചു.
ഉപഭോക്താവിന്റെ പരാതികള്‍ ലഭിച്ചതിനുശേഷം 48 മണിക്കൂറിനകം സംവാദമാരംഭിക്കാനും, ഒരു മാസത്തിനുള്ളില്‍ പരിഹാരം ഉറപ്പാക്കണമെന്നും നിയമം നിര്‍ദേശിക്കുന്നതായും, ഈ മാനദണ്ഡങ്ങള്‍ ലംഘിച്ചതാണ് കമ്മീഷന്‍ വിലയിരുത്തിയത്. ഡി.ബി. ബിനു അധ്യക്ഷനായ ബെഞ്ച്, അംഗങ്ങളായ വി. രാമചന്ദ്രന്‍, ടി.എന്‍. ശ്രീവിദ്യ എന്നിവരുടെ നേതൃത്വത്തിലാണ് തീരുമാനം. ഉപഭോക്തൃ അവകാശങ്ങളെ അപമാനിക്കുന്ന തരത്തിലുള്ള നടപടികള്‍ക്ക് കമ്പനികള്‍ ഉത്തരവാദികളാകേണ്ടി വരുമെന്നും കമ്മീഷന്‍ ചൂണ്ടിക്കാട്ടി.