ന്യൂനമര്‍ദ്ദവും ചക്രവാതച്ചുഴിയും; സംസ്ഥാനത്ത് ശക്തമായ മഴയ്ക്ക് സാധ്യത; ഒറ്റപ്പെട്ടയിടങ്ങളില്‍ ഇടിക്കും കാറ്റിനും സാധ്യത; കടല്‍ക്ഷോഭം രൂക്ഷം; തീരദേശ മേഖലകളില്‍ താമസിക്കുന്നവര്‍ക്ക് ജാഗ്രതാ നിര്‍ദ്ദേശം
തിരുവനന്തപുരം: ന്യൂനമര്‍ദങ്ങളും ചക്രവാതച്ചുഴികളും ഒരുമിച്ചുള്ള സ്വാധീനത്തിന്റെ ഫലമായി സംസ്ഥാനത്ത് ശക്തമായ മഴയ്ക്ക് സാധ്യത. ജൂണ്‍ 22 മുതല്‍ 25 വരെ വിവിധ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. ഒറ്റപ്പെട്ടയിടങ്ങളില്‍ ഇടിയോടെയും കാറ്റോടെയും കൂടിയ ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
22ന് ആലപ്പുഴ, എറണാകുളം, തൃശൂര്‍, മലപ്പുറം, കോഴിക്കോട്, കണ്ണൂര്‍, കാസര്‍കോട് ജില്ലകള്‍, 23ന് മലപ്പുറം മുതല്‍ കാസര്‍കോട് വരെ ജില്ലകള്‍, 24ന് ഇതേ ജില്ലകളിലാകെ മഴക്കുള്ള സാധ്യത കണക്കിലെടുത്താണ് മുന്നറിയിപ്പ്. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കാനുള്ള സാഹചര്യം ശക്തമായ മഴയ്ക്കായി കണക്കാക്കപ്പെടുന്നു.
അതേസമയം, തിരുവനന്തപുരം, കൊല്ലം, പത്തനംതിട്ട, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് എന്നീ ജില്ലകളില്‍ മണിക്കൂറില്‍ 40 കിലോമീറ്റര്‍ വരെ വേഗതയിലുള്ള കാറ്റിനും ഇടത്തരം മഴയ്ക്കും സാധ്യതയുണ്ട്. വടക്കന്‍ കേരള തീരത്ത് നിന്നും വടക്കന്‍ കൊങ്കണ്‍ തീരത്തിലേക്കുള്ള ന്യൂനമര്‍ദ പാത്തിയും ഝാര്‍ഖണ്ഡില്‍ നിന്നും പശ്ചിമബംഗാളിലേക്ക് നീണ്ടുനില്‍ക്കുന്ന ശക്തമായ ന്യൂനമര്‍ദവും മഴയ്ക്ക് അനുകൂല സാഹചര്യങ്ങള്‍ സൃഷ്ടിക്കുകയാണ്.
കടല്‍ക്ഷോഭം രൂക്ഷമാകാനാണ് സാധ്യത. ചെറിയ വള്ളങ്ങള്‍, ബോട്ടുകള്‍ കടലില്‍ ഇറക്കുന്നത് ഒഴിവാക്കണമെന്ന് അധികൃതര്‍ മുന്നറിയിക്കുന്നു. കള്ളക്കടല്‍ പ്രതിഭാസത്തിനും ഉയര്‍ന്ന തിരമാലക്കും സാധ്യതയുള്ള ഈ ഘട്ടത്തില്‍ മത്സ്യബന്ധന യാനങ്ങള്‍ കടലില്‍ ഇറക്കുന്നത് അപകടകരമാണെന്നും ബോട്ടുകള്‍ ഹാര്‍ബറില്‍ സുരക്ഷിതമായി കെട്ടിയിട്ട് സൂക്ഷിക്കണമെന്നും നിര്‍ദേശമുണ്ട്.
ബീച്ചുകളിലേക്കുള്ള വിനോദയാത്രകളും കടലില്‍ ഇറങ്ങി നടത്തുന്ന വിനോദപ്രവൃത്തികളും പൂര്‍ണമായും ഒഴിവാക്കണമെന്ന് മുന്നറിയിപ്പ്. തീരദേശ മേഖലകളില്‍ താമസിക്കുന്നവര്‍ അധിക ജാഗ്രത പാലിക്കണമെന്നും ആവശ്യമെങ്കില്‍ സുരക്ഷിത സ്ഥാനങ്ങളിലേക്ക് മാറണമെന്നും അധികൃതര്‍ അറിയിച്ചു. മുന്നറിയിപ്പ് പിന്‍വലിക്കുന്നതുവരെ തീരപ്രദേശങ്ങളില്‍ മുഴുവന്‍ ജനങ്ങളും അധിക സൂക്ഷ്മത പാലിക്കണമെന്ന് കേന്ദ്ര കാലാവസ്ഥാ വകുപ്പ് നിര്‍ദേശിക്കുന്നു.