എമ്പുരാന്‍ സിനിമ എല്ലാവരും കാണണം;. എല്ലാവരെയും സിനിമ വിമര്‍ശിക്കുന്നുണ്ട്; ഒരു ഭാഗവും സിനിമയില്‍ നിന്ന് മുറിച്ചുമാറ്റേണ്ടതില്ല; തന്റേടത്തോടെ സിനിമ ചെയ്ത പൃഥ്വിരാജിന് അഭിവാദ്യമെന്നും സജി ചെറിയാന്‍
എമ്പുരാന്‍ സിനിമ എല്ലാവരും കാണണം: സജി ചെറിയാന്‍
തിരുവനന്തപുരം: എമ്പുരാന്‍ സിനിമ എല്ലാവരും കാണണമെന്ന് സാംസ്‌കാരിക മന്ത്രി സജി ചെറിയാന്‍. മനുഷ്യര്‍ ഒന്നാണെന്ന ആശയം തരുന്ന സിനിമയാണ് എമ്പുരാന്‍. എല്ലാവരെയും സിനിമ വിമര്‍ശിക്കുന്നുണ്ട്. ഒരു ഭാഗവും സിനിമയില്‍ നിന്ന് മുറിച്ചുമാറ്റേണ്ടതില്ല. തന്റേടത്തോടെ സിനിമ ചെയ്ത പൃഥ്വിരാജിന് അഭിവാദ്യമെന്നും സജി ചെറിയാന്‍ പറഞ്ഞു.
കേരളത്തില്‍ ഇറങ്ങിയതില്‍ വച്ച് വ്യത്യസ്തമായ സിനിമയാണ് എമ്പുരാന്‍. ലോക സിനിമയോട് കിടപിടിക്കുന്ന സിനിമയില്‍ സാമൂഹികമായ പല പ്രശ്നങ്ങളും പ്രതിഫലിപ്പിക്കുന്നുണ്ട്. നമ്മുടെ നാട്ടിലെ ജനങ്ങള്‍ കാണേണ്ട സിനിമയാണ്. സിനിമയാകുമ്പോള്‍ സാമൂഹിക പ്രശ്നങ്ങള്‍ പലതും ഉന്നയിക്കും. കലാരൂപത്തെ കലാരൂപമായി കണ്ട് ആസ്വദിക്കണമെന്നും സജി ചെറിയാന്‍ പറഞ്ഞു.
നമ്മളെല്ലാവരും ഒന്നാണ്, ഇന്ത്യക്കാരാണ് എന്നാണ് സിനിമയുടെ ആശയം. അതില്‍ കത്തിവയ്‌ക്കേണ്ടതില്ല. ആവിഷ്‌കാര സ്വാതന്ത്ര്യത്തിനു മേലുള്ള കത്തിവയ്പ്പാണ് റീ സെന്‍സറിങ്. ഇതിനു മുന്‍പ് ഇതിനേക്കാള്‍ ശക്തമായ പ്രമേയങ്ങള്‍ സിനിമയില്‍ അവതരിപ്പിച്ചിട്ടുണ്ട്. തെറ്റിധാരണയുണ്ടാക്കി ആളുകള്‍ക്കിടയില്‍ ആശയക്കുഴപ്പം ഉണ്ടാക്കേണ്ടതില്ല. എല്ലാവരും സിനിമ കാണണം. വര്‍ഗീയത അപകടമാണ്. വര്‍ഗീയതയ്ക്കെതിരായ ആശയ പ്രചാരണം നടത്താന്‍ എമ്പുരാന്‍ ടീം മുന്നോട്ട് വന്നതിനെ അഭിനന്ദിക്കുന്നു. മോഹന്‍ലാലിന്റെ ഖേദപ്രകടനം അദ്ദേഹത്തിന്റെ അഭിപ്രായമാണെന്നും സജി ചെറിയാന്‍ പറഞ്ഞു.