അനുജനെ ഹാളിൽ ഇരുത്തിയ ശേഷം മുറിയിൽ കയറി തീകൊളുത്തി; അമ്മ മടങ്ങിയെത്തിയപ്പോൾ 16കാരി മരിച്ച നിലയിൽ; വലിയമലയിലെ വാടക വീട്ടിലെത്തിയിട്ട് രണ്ടാഴ്ച; അന്വേഷണം ആരംഭിച്ച് പോലീസ്

തിരുവനന്തപുരം: വലിയമലയിൽ പ്ലസ് വൺ വിദ്യാർഥിനിയെ വാടകവീട്ടിലെ കിടപ്പുമുറിയിൽ തീകൊളുത്തി മരിച്ച നിലയിൽ കണ്ടെത്തി. പെരിന്തൽമണ്ണ സ്വദേശി വിഷ്ണു വർഷ (16) ആണ് മരിച്ചത്. തിങ്കളാഴ്ച വൈകീട്ട് അഞ്ചുമണിയോടെയായിരുന്നു സംഭവം. ആത്മഹത്യയെന്നാണ് പോലീസിന്റെ പ്രാഥമിക നിഗമനം.

വീട്ടിൽ മറ്റാരുമില്ലാത്ത സമയത്താണ് പെൺകുട്ടി തീകൊളുത്തിയത്. രണ്ട് വയസ്സുള്ള അനുജനെ വീടിന്റെ ഹാളിലിരുത്തിയ ശേഷം വിഷ്ണു വർഷ കിടപ്പുമുറിയിൽ കയറി തീകൊളുത്തുകയായിരുന്നു എന്നാണ് പോലീസ് നൽകുന്ന വിവരം. സ്കൂളിൽനിന്ന് അമ്മയും അനുജനും തിരിച്ചെത്തിയപ്പോഴാണ് തീപ്പൊള്ളലേറ്റ നിലയിൽ വിഷ്ണു വർഷയെ കണ്ടെത്തിയത്. മരണപ്പെട്ട ദിവസം വിദ്യാർഥിനി സ്കൂളിൽ പോയിരുന്നില്ല.

ആത്മഹത്യയുടെ കാരണം ഇതുവരെ വ്യക്തമല്ല. വലിയമല പോലീസ് സംഭവത്തിൽ അന്വേഷണം ആരംഭിച്ചു. തൊളിക്കോട് ഹയർസെക്കൻഡറി സ്കൂളിലെ പ്ലസ് വൺ വിദ്യാർഥിനിയാണ് വിഷ്ണു വർഷ. വലിയമല കൊറളിയോടുള്ള വാടകവീട്ടിൽ കുടുംബം താമസിക്കാൻ എത്തിയിട്ട് രണ്ടാഴ്ചയേ ആയിട്ടുള്ളൂ. വിഷ്ണു വർഷയുടെ അമ്മ ഐഎസ്ആർഒ ജീവനക്കാരിയും അച്ഛൻ പെരിന്തൽമണ്ണയിലെ ഒരു സ്കൂളിലെ ബസ് ഡ്രൈവറുമാണ്.