ഇടുക്കിയിൽ വീണ്ടും ഭീതി പരത്തി പടയപ്പ; വിദ്യാർത്ഥികളുമായെത്തിയ സ്കൂൾ ബസിന് നേരെ പാഞ്ഞടുത്തു; കുട്ടികൾ രക്ഷപ്പെട്ടത് തലനാരിഴക്ക്

ഇടുക്കി: മൂന്നാറിൽ വീണ്ടും ഭീതി പരത്തി കാട്ടാന പടയപ്പ. വിദ്യാർത്ഥികളുമായി എത്തിയ സ്കൂൾ ബസ് പടയപ്പയുടെ മുൻപിൽപ്പെടുകയായിരുന്നു. ഇടുക്കിയിലെ നെറ്റിമേടിനും കുറ്റിയാർ വാലിക്കും ഇടയിൽ ഇന്നലെ വൈകിട്ടാണ് സംഭവമുണ്ടായത്. സ്കൂൾ വിട്ട് വരുന്നതിനിടെയാണ് ബസ് കാട്ടാനയുടെ മുന്നിൽ പെട്ടത്.

ആനയെ കണ്ടതോടെ സ്കൂൾ ബസ് നിർത്തിയിട്ടു. എന്നാൽ ബസിന് നേരെ പടയപ്പ പാഞ്ഞടുത്തതോടെ കുട്ടികൾ ഭീതിയിലായി. തുടർന്ന് കുട്ടികൾ നിലവിളിച്ചു. പിന്നീട് ബസ് പിറകോട്ടെടുക്കുകയായിരുന്നു. ഇതോടെയാണ് ആന പിന്മാറിയത്. ഈ സമയത്ത് ഒരു ബൈക്ക് യാത്രക്കാരനും കാട്ടാനയുടെ മുന്നിൽപ്പെട്ടിരുന്നു. അയാൾ ബൈക്ക് പിറകോട്ടെടുത്തതോടെ താഴെ വീഴുകയും ചെയ്തു.

ഈ പ്രദേശത്ത് നേരത്തെ തന്നെ പടയപ്പയുടെ സാന്നിധ്യമുണ്ടായിരുന്നു. കഴിഞ്ഞ ദിവസം ജനവാസ മേഖലയിൽ ഇറങ്ങി വലിയ നാശനഷ്ടം വിതച്ച പടയപ്പയെ വനപാലകർ നിരീക്ഷിച്ചു വരികയായിരുന്നു. അതേസമയം, പടയപ്പ ആരേയും ആക്രമിച്ചിട്ടില്ലെന്നാണ് ലഭിക്കുന്ന വിവരം. സംഭവത്തെ തുടർന്ന് പ്രദേശത്ത് ആർആർപി സംഘത്തിൻ്റെ നിരീക്ഷണം തുടരുകയാണ്.