ഇതര സംസ്ഥാന തൊഴിലാളികളെ കേന്ദ്രീകരിച്ച് ലഹരി വിൽപ്പന; ബ്രൗൺ ഷുഗറുമായി രണ്ട് അന്യസംസ്ഥാന സ്വദേശികൾ അറസ്റ്റിൽ; പിടിച്ചെടുത്തത് 18 ഗ്രാം ബ്രൗൺ ഷുഗർ

എറണാകുളം: കോതമംഗലത്ത് വിൽപ്പനയ്ക്കായി കടത്തി കൊണ്ടുവന്ന ബ്രൗൺ ഷുഗറുമായി അന്യസംസ്ഥാന സ്വദേശികൾ പിടിയിൽ. അസം സ്വദേശികളായ രണ്ട് പേരാണ് പിടിയിലായത്. ഹഫിജ് ഉദ്ധീൻ, സഫീക്കുൾ ഇസ്‌ലാം എന്നിവരെയാണ് എക്സൈസ് സംഘം അറസ്റ്റ് ചെയ്തത്. ഇവരുടെ പക്കൽ നിന്നും 18 ഗ്രാം ബ്രൗൺ ഷുഗറും പിടിച്ചെടുത്തു. ഇതര സംസ്ഥാന തൊഴിലാളികൾക്കിടയിൽ വിൽപ്പന ലക്ഷ്യമിട്ടാണ് ഇവർ മയക്കുമരുന്ന് കടത്തിക്കൊണ്ട് വന്നത് എന്നാണ് എക്സൈസ് പറയുന്നത്.

കോതമംഗലം എക്സൈസ് റേഞ്ച് ഇൻസ്‌പെക്ടർ സിജോ വർഗീസും സംഘവും നടത്തിയ പരിശോധനയിലാണ് ബ്രൗൺ ഷുഗറുമായി ഇരുവരെയും പിടികൂടിയത്. പ്രിവന്റീവ് ഓഫീസർമാരായ സുധീർ മുഹമ്മദ്, പി.ബി ലിബു, എം.റ്റി ബാബു, സിവിൽ എക്സൈസ് ഓഫീസർമാരായ റസാഖ് കെ.എ, സോബിൻ ജോസ്, എന്നിവരും പരിശോധനാ സംഘത്തിലുണ്ടായിരുന്നു.